Талбайн теннисний амьд домог Сербийн Новак Жокович тав дахь оролдлогоороо олимпийн аварга боллоо. Түүний гайхалтай замналд гагцхүү олимпийн алтан медаль л дутуу байсан бол өчигдөр/2024.08.04/ дутуугаа гүйцээж, Парисын олимпод түрүүлэв. Тэрбээр финалд Испанийн залуу од Карлос Алькаразтай учраа таарсан бөгөөд хоёр цаг, 50 минут цаг үрэгжилсэн хоёр ээлжийн тоглолтод 7-6, 7-6 гэсэн харьцаатай ялжээ.

Ийнхүү Новак Жокович бүхий л дөрвөн том цомд түрүүлснээс гадна олимпийн наадмын аварга болсон тав дахь теннисчин болж байна. Түүнээс өмнө Рафаэль Надаль, Андре Агасси, Стеффи Граф, Серена Уиллиамс нар энэ амжилтыг үзүүлж байв.

Өдгөө 37 настай Новак Жокович олимпийн ганцаарчилсан төрөлд түрүүлсэн хамгийн ахмад теннисчин болжээ.

2008 оны Бээжингийн олимпийн хүрэл медальт Новак Жокович алтан медаль хүртсэнийхээ дараа "Би үүнээс илүү бахархаж, аз жаргалтай байж чадахгүй. Сербийн төлөө тоглох нь үргэлж миний хамгийн чухал, жинхэнэ таашаал, миний нэн тэргүүний зорилго байсаар ирсэн. Эх орондоо алтан медаль авчирч чадсан элит тамирчдын нэг хэсэг болсондоо үнэхээр бахархаж байна. Энэ спортын түрүүлэх боломжтой бүх шагналд түрүүлсэн би үнэхээр их азтай хүн юм" гэв.

Финалын тоглолт тун сонирхолтой болсон бөгөөд 21 настай Алькараз хамгийн залуудаа олимпийн ганцаарчилсан төрөлд түрүүлсэн теннисчин болоход тун ойрхон байсан. Тэрбээр хоёр дахь ээлжийн тоглолтыг тэргүүлж явсан ч төгсгөл хэсэгтээ алдаа гаргаж, Новакт тэргүүллээ алдсан юм.  Тоглолтын дараа Алькараз "Өнөөдрийн өөрийн тоглолтдоо сэтгэл хангалуун байна. Гэхдээ зарим үедээ шилдэг тоглолтоо гаргаж чадаагүйдээ жаахан харамсч байна. Жишээлбэл, тай брейк дээр Новак шилдэг тоглолтоо гаргалаа. Би тэгж чадсангүй. Тэр мөчүүдийг бодохоор гунигтай байна. Миний өмнө ууртай Новак байлаа. Тэр өнөөдөр гайхалтай тоглолоо. Түүний түвшин үнэхээр өндөр түвшнийх" гэжээ. 

Энэ удаагийн олимпийн теннис тун сонирхолтой боллоо. Их Британийн шилдэг тамирчин, олимпийн хоёр удаагийн аварга Энди Маррей зодог тайлж буйгаа зарласан бол Испанийн амьд домог Рафаэль Надаль дахин шороон талбайд гарах эсэхээ мэдэхгүй байна гэв. Мөн эмэгтэйчүүдийн ганцаарчилсан төрөлд Хятадын Цзэнь Чинвэн түрүүлж, Хорватын Донна Векич мөнгөн медаль хүртсэн юм. Олимп эхлэхээс өмнө зодог тайлах бодолтой байсан Донна Векич медалийн тавцанд зогссон нь гайхалтай.