АНУ-ын Хууль зүйн яам өнгөрсөн долоо хоногт "Tiktok"-ийг  хүүхдийн цахим нууцлалын хуулийг зөрчсөн, холбооны өөр агентлагтай тохиролцсон гэх үндэслэлээр шүүхэд өгөв. Калифорнийн холбооны шүүх энэ хэргийг дааж авсан бөгөөд "Tiktok" компанийн үйл ажиллагааг хянан шалгаж, АНУ-д үргэлжлүүлэн ажиллах эсэхийг нь шийднэ. Эсвэл АНУ-д үйл ажиллагаагаа явуулахын тулд өөрчлөлт гаргах эсэхийг талуудтай харилцан тохиролцох журмаар шийдвэрлэнэ.

"Tiktok" нь залуу хэрэглэгчдийн дунд түгээмэл хэрэглэгддэг, чиг хандлагыг тодорхойлох платформ юм. Энэ нь Хятадад төвтэй "ByteDance" компанийн мэдэлд байдаг. Тиймээс Хятадын тал бага, өсвөр насны хүүхдүүдийн хувийн мэдээллийг цуглуулж байна гэж АНУ-ын Хууль зүйн яам үзэж буй.

Хууль зүйн яамны Иргэний хэргийн хэлтсийн дарга Брайан М.Бойнтон “Дахин гэмт хэрэг үйлдэж, их хэмжээний үйл ажиллагаа явуулдаг шүүгдэгч нар бага насны хүүхдийн хувийн мэдээллийг эцэг эхийн зөвшөөрөл, хяналтгүйгээр цуглуулж, ашиглахаас урьдчилан сэргийлэхийн тулд энэ арга хэмжээг авах шаардлагатай байна” гэжээ. Өмнө нь 2019 онд холбооны засгийн газар "Musical.ly"-ийг 13-аас доош насны хүүхдийн хувийн мэдээллийг цуглуулах, ашиглах талаар эцэг эхчүүдэд мэдэгдээгүй тул Хүүхдийн онлайн нууцлалыг хамгаалах хууль буюу "COPPA"-г зөрчсөн гэж үзэн шүүхэд өгсөн байдаг.

Хууль зүйн яамнаас цахим платформийг ашиглах хүүхдийн насны хязгаарыг санал болгож буй. Хэрэв "Tiktok" платформ хэрэглэгчдийн насыг 13 наснаас дээш болгож, эцэг эхийн хараа хяналт тавих боломжийг олгох бол шүүхийн нэхэмжлэлээ буцаана гэж мэдэгдээд буй.

Эх сурвалж: FRANCE24