Вивианне Робинсон гэх америк бүсгүй Парисын олимпийг үзэхийг үнэхээр хүсчээ. Өдгөө 66 настай түүнийг олимпийн үнэнч фэн гэж тодорхойлж болох бөгөөд сүүлийн 40 гаруй жилийн хугацаанд долоон олимпийн наадам үзсэн гэнэ. Гэхдээ энэ удаагийнх шиг өндөр зардал гаргаж байгаагүй аж. Түүний хувьд Парисын олимпийг үзэх гэж 40 мянган ам.доллар зарцуулжээ. Одоо тэр зардлаа нөхөх гэж дахин хоёр жил хоёр ажил хийх хэрэгтэй болжээ.

Зээлийн картаа улаалгаж, хоёр ажил хийсэн Робинсон нийт 38 арга хэмжээ, тэмцээний тасалбар худалдан авчээ. Тэрбээр өдрийн цагаар Лос Анжелесын Вениц далайн эрэг дээр ажиллаж, орой нь хүнсний дэлгүүрт савлагч хийдэг гэв. Вивианне энэ талаараа "Мөнгөө хадгалах хэцүү байсан. Үнэхээр их мөнгө хэрэг болсон. Гэхдээ харамссангүй" гэлээ.

Түүний сэтгэлд нийцээгүй ганц зүйл нээлтийн ёслолын үйл ажиллагаа. Вивианне нээлт үзэх гэж 1600 ам.доллар зарцуулсан ч ганцхан үзсэн зүйл нь гүүрэн дээрх дэлгэц гэнэ. Энэ талаараа тэрбээр "Тэр мөнгийг олох ямар урт хугацаа зарцуулдгийг мэдэх үү? Гэхдээ амьдралд юу ч тохиолдож болно. Амьдрал үргэлжилнэ. Ялагдаж сурч байж л ялж сурна" гэв.

Вивианне Робинсоны ээж нь 1984 оны Лос Анжелесын олимпийн үеэр тамирчдын орчуулагчаар ажиллаж байжээ. Энэ үеэс л тэрбээр олимпийн наадамд татагдаж, үргэлж хажуунаас нь үзэхийг хүсдэг болов. Ээж нь ажлаасаа ирэх бүртээ охиндоо тамирчдын бэлэглэсэн энгэрийн тэмдгийг өгдөг байжээ. Энэ цуглуулгыг одоо ч тэрбээр арвижуулж байна. Цуглуулгынхаа талаар Вивианне "Надад бүхий л төрлийн энгэрийн тэмдэг байгаа. Тамирчидтай уулзах бүртээ л энгэрийн тэмдгээ солилцдог. Хуучин хамгаалалт одоогийнх шиг чанга байсангүй. Гэтэл одоо тамирчдын тосгон руу ойртох аргагүй болжээ" гэлээ.

Вивианне Робинсон 1996, 2000, 2004, 2012, 2016 онуудын олимпийг алгасаагүй. Харин 2008 онд аяллын зардлаа олж чадаагүй бол 2021 онд тасалбараа авсан байсан ч цар тахлын улмаас үзэгчгүй болсон билээ.

Ирэх 2028 оны олимп түүний гэр болох Лос Анжелес хотод болно. Энэ ч утгаараа Вивианне гэрээ очмогцоо ажилдаа орж, ирэх олимпийг үзэх мөнгөө хадгалж эхэлнэ.