Ойрхи Дорнодын нөхцөл байдал хурцадмал болсон тул Бейрут дахь АНУ-ын Элчин сайдын яам Ливанд байх иргэдээ ямар ч хамаагүй аргаар тус улсаас гарахыг уриалав. Их Британийн Гадаад хэргийн сайд Дэвид Ламми мөн адил өөрийн улсын иргэдээ яаралтай Ливанаас гарахыг сануулаад байна. Хамасын улс төрийн удирдагч Исмаил Ханиег нас барахаас хэдэн цагийн өмнө Израиль Хезболлагийн командлагч Фуад Шукрыг устгасан гэж мэдэгджээ. Тиймээс Израилийн эсрэг Хамас, Хезболла зэрэг бүлэглэл цохилт өгч эхэлж байгаа юм.

Хезболла бүлэглэл орон нутгийн цагаар Ням гаригийн өглөөний 00:25 цагийн орчимд Израилийн хойд хэсэгт орших Бейт Хиллел хот руу олон арван пуужин харважээ.

Олон нийтийн сүлжээгээр цацагдсан дүрс бичлэгт Израилийн агаарын довтолгооноос хамгаалах систем пуужингуудыг сөнөөж байгааг харуулсан байна. Одоогоор амь үрэгдэгсдийн талаар мэдээлэл гараагүй. Иорданы Гадаад хэргийн яам мөн иргэддээ хандан зөвлөгөө өгч, Ливанд байгаа хүмүүсийг нэн даруй орхин явахыг, бусад хүмүүсийг тийшээ явахгүй байхыг анхааруулжээ. Канад улс иргэддээ Ливан руу явахгүй байх зөвлөмжөөс гадна Израиль руу аялахаас зайлсхийхийг анхааруулав. Учир нь бүс нутагт "нөхцөл байдал сэрэмжлүүлэггүйгээр улам дордож болзошгүй"гэж тайлбарлаж байна.

Эх сурвалж:BBC