NBA-ийн тамирчдыг 1992 оноос эхлэн олимпод оролцохыг зөвшөөрснөөс хойш үеийн үед АНУ-ын шигшээ баг олны анхаарлыг татаж ирсэн. Мөн тэд хэзээ ч олимпийн тамирчдын тосгонд байрлаж үзээгүй. Энэ ч утгаараа энэ жил ч тамирчдын тосгоноос гадуур байрлаж байгаа аж. Форбс сэтгүүлийн Жастин Бирнбовын мэдээлснээр АНУ-ын сагсан бөмбөгийн шигшээ баг Парис хотын төвд 800 өрөөтэй тансаг зэрэглэлийн зочид буудлыг түрээсэлжээ. Энэ зочид буудалд тамирчдаас гадна тамирчдын гэр бүл, арын алба, туслахууд, NBA-ийн төлөөлөгчид байрлаж байгаа гэнэ.

Харин буудлын зардалд 15 гаруй сая ам.доллар зарцуулжээ. Гэтэл 20 хүнтэй АНУ-ын тулязуур сэлэмний багийн зардал 300-400 мянган ам.доллар болжээ.

15 сая ам.долларын зардалд тамирчдын зочид буудлын төлбөрөөс гадна, тусгай захиалгат нислэг, тамирчдын тээврийн зардал, хангамж, каргоны зардал зэрэг зүйлс багтжээ.

Парисын олимпийн тамирчдын тосгоны ор нь картон цаасаар хийгдсэн, өрөө нь агааржуулагчгүй зэрэг асуудал нь тамирчдад таагүй байдал төрүүлэх учир гадуур байрлах нь зөв гэж үзсэн аж. Одоогийн байдлаар зочид буудлын нэрийг ил болгоогүй боловч үнэнч фэнүүд нь олж очин үүдэнд нь олноороо цугларч байгаа гэжээ.