Парисын олимпийн жүдо бөхийн ганцаарчилсан төрлийн сүүлийн жингийн барилдаанууд өчигдөр/2024.08.02/ боллоо. Таамаг ёсоор Тедди Ринер ард түмнийхээ итгэлийг алтан медалиар хариулж, гурав дахь удаагаа олимпийн аваргаар тодорчээ. Олимп эхлэхээс өмнө Францын жүдогийн холбоо эх орондоо болж буй наадмаас дөрвөн алтан медаль авах зорилго тавьсан ч эцэст нь өнөөх Тедди Ринер л анхны алтан медалийг нь авчрав.

Алтан медаль хүртсэн Тедди Ринер "Хүмүүс намайг гурав дахь алтан медалиа хүртвэл энэ спортын түүхэнд тэмдэглэгдэн үлдэнэ гэсэн. Өнөөдөр би өөрийн шүтээн Тадахиро Номүрад дөхөж очлоо. Би эх орныхоо төлөө, өөрийнхөө төлөө баярлаж, бахархаж байна. Эх орондоо үүнийг хийсэн нь үнэхээр гайхалтай" гэв.

Японы алдарт Номүра аварга эрэгтэйчүүдийн -60 кг-ын жинд 1996-2004 оны хооронд олимпийн гурван алтан медальтай билээ.

Түүнээс ирэх 2028 оны олимпод оролцох эсэхийг асуухад Тедди Ринер "2028 оны Лос Анжелесын олимпод оролцоно гэж найдаж байна. Гэхдээ эхлээд амрах хэрэгтэй байна" гэжээ.

Энэ жингийн финалд Францын аваргатай Өмнөд Солонгосын Ким Мин Жон тунасан. Харамсалтай нь иппон үнэлгээгээр ялагдсан юм. Гэхдээ түүний цаг ирж байгааг 23 настай Ким Мин Жон мэдэж байна. Тэрбээр ярихдаа "Тедди Ринер бол миний шүтээн. Би түүн шиг болохыг хүсдэг. Парисын олимп шиг ийм том тэмцээнд түүнтэй өрсөлдсөн нь нэр төрийн хэрэг. Хэдий харамсмаар үр дүнгээр өндөрлөсөн ч түүнийг шилдэг нь гэдгийг ойлголоо. Түүнээс суралцаж, ирэх тэмцээнүүдэд шилдэг барилдаанаа гаргах болно" гэлээ.

Энэ жингийн хүрэл медалийн эздээр Узбекистаны Алишер Юсупов, Тажикстаны Темур Рахимов нар тодорсон аж.

Японы эрэгтэйчүүдийн жүдогийн шигшээ багийн ахлах дасгалжуулагч Кэйжи Сүзүки Ринерийн талаар "Тэр том тэмцээнүүдэд гайхалтай амжилт гаргадаг. Тэр бол гайхалтай. Манай жүдоч энэ жинд түрүүлж чадаагүй нь харамсалтай. Гэхдээ Ринер хүмүүсийн хүлээлтэд хүрлээ" гэжээ.

Өдгөө 35 настай Тедди Ринер ийнхүү дэлхийн есөн удаагийн, олимпийн гурван удаагийн аварга болж, жүдогийн түүхэнд тодоос тод үлдэхээр боллоо. Түүний барилдааныг үзэх Францын ерөнхийлөгч Эммануэль Макрон өөрийн биеэр өчигдөр Чамп-де-Марс цэнгэлдэхэд ирсэн юм.