Улаанбаатар хотод өчигдөр /2024.08.01/үдээс хойш орсон борооны улмаас Хан-Уул дүүргийн 12, 13, 14 дүгээр хороонд үерийн эрсдэлтэй нөхцөл байдал үүсээд байна. Энэ талаар “News” агентлаг газар дээр нь ажиллаж,  нөхцөл байдлыг тодрууллаа.

-Үерийн эрсдэл үүсэнээр хэчнээн айл өрхийг нүүлгэн шилжүүлээд байна вэ. Яг одоогийн нөхцөл байдлын талаар мэдээлэл өгөөч?

Хан-Уул дүүргийн Засаг даргын орлогч А.Амартүвшин:

-Хан-Уул дүүргийн 12, 13, 14 дүгээр хороо буюу Биокомбинат, Шувуун фабрик, Өлзийт хороолол орчимд өчигдөр үдээс хойш усархаг бороо орсноор үерийн эрсдэл үүсч, дүүргийн Шурхай штаб ажиллаж байна. Урьд шөнөөс онцгой, цагдаа, хороо, эмнэлгийн байгууллагаас нийт 36 албан хаагч ажиллаж эхэлсэн.

Одоогоор Өлзийт хорооллоос 62 иргэн,  Шувуун фабрикаас 117 иргэн, Би комбинатаас 3 иргэнийг түр байр луу шилжүүлээд байна.

-Түргэний голын урсац эрс нэмэгдсэнээс далан сэтэрсэн тухай яригдаж байна. Сэргээн засах ажил эхэлчихсэн үү?

-Түргэний гол далангаараа хашигдаад явж байгаа ч их хэмжээний бороо орсноос гурван газар далан сэтэрсэн. Далан сэтэрснээс Түргэний голын ус гэр хороолол руу хальсан. Одоогоор баг бүрэлдэхүүн даланг засч янзлах, гудамжийг цэвэрлэж янзлах. аюулд өртөж болзошгүй айлуудыг нүүлгэн шилжүүлж байна. Бороо зогссоны дараа ариутгал халдваргүйжүүлэлт хийнэ.

-Өлзийт хороололд хэчнээн иргэн амьдарч байна вэ. Хэчнээн иргэн үерт өртөх эрсдэл үүсээд байна вэ?

Хан-Уул дүүргийн 14 дүгээр хорооны Засаг дарга Д.Ганбадрах:

-Манай хороо 1950 өрх, 6100 гаруй оршин суугчтай.  Үерийн эрсдэлтэй бүсэд 80 гаруй айл амьдарч байна. Үүссэн нөхцөл байдалтай холбоотойгоор урьд шөнөөс оршин суугчиддаа сэрэмжлүүлэг мэдээллийг хүргэж ажиллалаа. Гэр нь усанд автсан айлуудыг ерөнхий боловсролын  59 дүгээр сургууль руу шилжүүлсэн. Нийт 7 иргэнийг байршуулсан. Мөн байшин хашаа руу нь ус орсон 66 айл байна, орон байр нурсан гэх мэдээлэл ирээгүй байна.

Дүүргийн шуурхай штабаас техник хэрэгсэл гарган, уулын дайрга чулууг голын сэтэрч байгаа хэсэг дээр асгаж, хүчитгэх, далан босгох ажил хийж байна.

-Түргэний гол энэ жил анх удаа үерлэж байна уу. Мөн голын гольдролыг хааж барилга байшин барьснаас иргэд олноороо үерт өртөх эрсдэлтэй тулав уу. Өмнө нь ийм эрсдэл үүсч байсан уу?

-Манай хороо нь Түргэний голын сав газар оршдог. Голын сав газар оршдог учраас жилийн хур тунадас ихтэй үед Түргэний гол үерлэдэг.  Өчигдрийн борооноор ойрын таван жилд ороогүй хур тунадас буулаа.

Богд уулынхаа дээд энгэрээс Түргэний гол эх авдаг, үүн дээр их хур тунадас бууж, уулын сав жалга руугаа орж ирснээр голын хэсгийн айлууд маань үерт автсан.

-Бороо зогсох төлөв харагдахгүй байна. Цаашид ямар арга хэмжээ авах вэ?

-Бороо өнөөдөр, маргааш үргэлжлэн орох мэдээлэл ирсэн. Шуурхай штаб 24 цагаар ажиллаж байна. Бороо зогссоны дараа халдваргүйжүүлэлт хийнэ. Гүүрэн гарц, явган хүний гарц үерт автсан тул сэргээн засах ажил руу яаралтай орно.

Б.Цэрэн: Хоёр өрхийн 7 иргэнийг түр хоргодох байранд байршуулаад байна

Улаанбаатар хотод өчигдөр үдээс хойш орсон борооны улмаас Нийслэлийн Хан-Уул дүүргийн 14 дүгээр хороо буюу Өлзийт, 13 дугаар хороо буюу Шувуун Фабрик орчимд үерийн эрсдэлтэй нөхцөл байдал үүссэн байна.  Бороо орох үеэр Шувуун фабрикийн далан сэтэрснээс айлуудын гэр хашаа усанд автаад буй. Энэ талаар тус дүүргийн Засаг дарга Б.Цэрэнгээс тодрууллаа.

Тэрбээр "Түргэний голын түвшин сүүлийн 10 гаруй жилийн хугацаанд байгаагүйгээр нэмэгдсэн. Мөн Туул голын төгсгөлийн хэсэгт үерийн далан сэтэрснээс үүдэн 160 орчим айл өрх үерийн эрсдэлтэй нөхцөлд орсон байна. Өнгөрсөн шөнийн байдлаар голын усны түвшин бага зэрэг татарсан.

Өнгөрсөн шөнөөс эхлэн сэтэрсэн 3-4 даланг дахин бэхжүүлэх, нөхөн сэргээх бэхжүүлэх ажил хийгдэж байна. Одоогийн байдлаар хоёр өрхийн долоон иргэнийг Хан-Уул дүүргийн 59 дүгээр сургууль дээр байрлах түр хоргодох байранд байрлуулсан.

Цаашид нөхцөл байдал хүндэрвэл айл өрхүүдийг нүүлгэн шилжүүлэх арга хэмжээг авна. Тиймээс шаардлагатай хүн хүч, техник технологийн бүрэн бүтэн байдлыг хангах, иргэдийг түр байрлуулах байраар хангахын тулд зарим сургууль, цэцэрлэгт байрлуулах арга хэмжээний бэлтгэл ажлыг бүрэн хангаж ажиллаж байна" гэв.

Үерийн эрсдэл үүссэн газар дээр өнөөдрийн байдлаар  Хан-Уул дүргийн Онцгой байдлын албан болон бусад холбогдох байгууллагын 70 орчим албан хаагч, 20 гаруй техник хэрэгсэлтэйгээр иргэдийг үерийн эрсдлээс авран хамгаалах ажилд оролцож байна.

Үерийн эрсдэл учирч болзошгүй талаар иргэд олон нийтэд анхааруулж, үерийн эрсдлийн хэмжээ буурах хүртэл өөрсдийн болон бусдынхаа амь нас, эрүүл мэнд, эд хөрөнгийг авран хамгаалж аюулгүй газар очих талаар анхааруулга сэрэмжлүүлэгийг нийслэл, дүүргийн онцгой байдлын байгууллагаас тогтмол өгч ажиллаж байгаа аж.