Орос болон барууны орнууд 24 хоригдол солилцсон талаар "The New York Times" сонин мэдээлэв. Тодруулбал, Оросын шоронд хоригдож байсан 16 хүн суллагдаж, эх орон руугаа буцсан байна. Хариуд нь АНУ, Норвеги, Герман, Польш, Словени зэрэг орнууд орос найман хоригдол суллаж, Москва руу илгээсэн.

Словени улсад тагнуулын хэргээр сэжиглэгдэн баривчлагдсан орос хосын хүүхдүүд мөн адил эх орондоо буцсан байна. Энэхүү хоригдол солилцох явц нь Зөвлөлт Холбоот Улс задарснаас хойш болсон хамгийн том солилцоо гэж шинжээчид тайлбарлаж буй. Туркийн нийслэл Анкара хотын нисэх буудал дээр Пүрэв гаригт хоригдол солих үйл ажиллагаа явагдсан байна. Барууны орнуудаас илгээж буй хоригдлуудыг ерөнхийлөгч Путин Москва хотын Внуково нисэх буудалд хүндэт харуул жагсаан угтаж авчээ.

Өнгөрсөн сард Москвагийн дээд шүүхээс тагнуулын гэмт хэрэгт сэжиглэгдэж, яллагдсан "The Wall Street Journal" сонины сэтгүүлч Эван Грешкович солилцоонд хамрагдаж буй. Түүний шүүхийн дүгнэлт гарахаас өмнө нэг жил гаруй хугацаанд хорьж байсан бөгөөд Москва өөрсдийн иргэдээ хоригдол солих журмаар авахын тулд Грешковичийг хүчээр хорьж байсан гэж үздэг. Солилцоог тохиролцох яриа хэлэлцээ 18 сар гаруй хугацаанд үргэлжилсэн бөгөөд АНУ-ын тэнгисийн цэргийн ахмад дайчин Пол Велан, Орос-Америкийн давхар иргэний харьяалалтай сэтгүүлч Алсу Курмашева, Орос-Британийн давхар иргэний харьяалалтай, АНУ-ын ногоон карттай иргэний хөдөлгөөний зүтгэлтэн Владимир Кара-Мурза зэрэг хүмүүсийг Оросын тал хүлээлгэн өгсөн.

Эх сурвалж: THE NEW YORK TIMES