Парисын олимпийн боксын төрөл эдгээр өдрүүдэд олны анхаарлыг татаж, хамгийн их яригдаж буй сэдэв болоод байна. Учир нь боксын төрөлд трансжендер хоёр тамирчин өрсөлдөж байгаа гэх. Өчигдөр/2024.08.01/ Алжирын боксчин Имане Хелиф болон Италийн боксчин Ангела Карини нар тулалдсан бөгөөд тулаан эхлээд удаагүй байхад Ангела Карини нүүрэндээ нэг цохилт авсны дараа тулааныг үргэлжлүүлэх хүсэлгүй гэдгээ мэдэгдэж, бууж өгсөн. Түүний хувьд Имане Хелиф бол хүйсээ солиулсан эрэгтэй хүн аж.

Тулааны дараа Ангела Карини ярихдаа "Би рингэнд тулалдах гэж гарсан. Бууж өгөөгүй. Гэхдээ нэг цохилт дэндүү их өвтгөлөө. Тиймээс л би хангалттай гэж хэлсэн. Хоёр дахь цохилтын дараа, энэ олон жил боксоор хичээллэхдээ мэдэрч байгаагүй хүчтэй өвдөлтийг хамрандаа мэдэрлээ. Хамрандаа тэгж хүчтэй цохиулаад тулааныг дуусгаж чадахгүй гэдгээ мэдсэн" гэв.

Харин Италийн ерөнхий сайд Жоржиа Мелони "Эрэгтэй генетикийн шинж чанартай тамирчдыг эмэгтэйчүүдийн тэмцээнд оруулах ёсгүй гэж бодож байна. Миний өнцгөөс энэ бол тэгш өрсөлдөөн биш" гэжээ.

Тэгвэл Имане Хелиф үнэхээр эрэгтэй хүн үү? Энэ талаар та бүхэндээ мэдээлэл өгье.

Энэ удаагийн Парисын олимпоос эхлэн IBA буюу Олон улсын сонирхогчдын боксын холбоо олимпийн боксын тэмцээнийг зохион байгуулах ажилд оролцохгүй болсон. Учир нь AIBA-ийн шүүлт асуудал их дагуулдаг, зохион байгуулалтаа тааруу хийдэг, авлигад идэгдсэн гэх шалтгааны улмаас олимпийн зохион байгуулагчид өөрсдөө боксын тэмцээнээ зохион байгуулж буй.

IBA-ийн өнгөрсөн жилийн дэлхийн аваргад Алжирын Имане Хелиф болон Тайванийн Лин Ю-Тин нар оролцохоор бүртгүүлсэн ч жендерийн шалгалтанд тэнцээгүй учир хасагджээ. Гэхдээ IBA-ийн зүгээс ямар шалгуураар тэнцээгүй гэдгийг нь ил болгоогүй аж. Ганц нотолгоо байгаа нь Хелиф болон Лин нарын шинжилгээнээс ХҮ хромосом илэрсэн гэдгийг IBA-ийн ерөнхийлөгч Умар Кремлев мэдэгджээ.

Хэрэв IBA өөрсдөө олимпийн тэмцээнээ зохион байгуулсан бол тэд оролцохгүй байсан гэнэ.

Олон улсын олимпийн хорооны зүгээс Имане Хелифийг эмэгтэй хүн гэдгийг мэдэгдэж, бусдын адил өрсөлдөх эрхтэй гэв. "Associated Press"-ийн мэдээлснээр Имане Хелифийн тестостерон буюу эр бэлгийн дааврын хэмжээ нь эмэгтэй хүнд байдаг хэмжээнээс л их гэнэ. Харин Тайванийн Лин Ю-Тин биохимийн шинжилгээнд бүдэрчээ.

Зарим эмэгтэйчүүдэд угаасаа тестостероны хэмжээ өндөр, эршүүд байдаг.

Алжирын олимпийн хороо ч Имане Хелифийг хамгаалж, түүнийг эсрэг үндэслэлгүй суртал ухуулга хийж байна гэлээ. Тус улсад хүйс солиулах хагалгаа зөвшөөрдөггүй аж. Өөрөөр хэлбэл, сошиал ертөнцөөр Имане Хелифийг эрэгтэй хүн гэх худал давалгаа өрнөж, түүнийг илтэд хуурамчаар эр хүн гэж үзэж байгаа гэлээ.

Исламын шашинтай Алжирт ЛГБТ-ийн эсрэг хатуу зогсдог бөгөөд ижил хүйстнүүдэд л гэхэд хоёр жилийн ялтай байдаг аж.

Ингээд та бүхэндээ дүгнээд хэлэхэд,

• Алжир улс ЛГБТ-г хүлээн зөвгөөрдөггүй бөгөөд Хелиф бол эмэгтэй хүн.
• Түүнийг багаасаа л эмэгтэй байсан гэдгийг нотлох нотолгоо хангалттай бий.
• Хелиф 2018-2023 оны хооронд ямар ч асуудалгүй олон улсын тэмцээнд оролцож байсан. Токиогийн олимпод хүртэл орж, Ирландын Келли Харрингтонд ялагдсан.
• Хамгийн ихээр авлигад идэгдсэн, асуудалтай IBA түүнийг жендерийн шалгалтад тэнцээгүй гэв. Гэхдээ ямар шалгуур, шалтгаанаар гэдгийг нь ил болгоогүй.
• Хелиф болон Лин нар Токиогийн олимпоос хойш Олон улсын олимпийн хорооны эрүүл мэндийн бүхий л шалгуурыг давж байсан.

Өөрөөр хэлбэл, Имане Хелифийн гадаад үзэмжээс шалтгаалж, түүнийг трансжендер гэх суртал ухуулга явж, хүмүүс ямар ч баримт нотолгоогүй, зүгээр л бусдын үгээр түүнийг шүүмжилж байна гэдгийг Олон улсын олимпийн хороо болон Алжирын олимпийн хороо мэдэгдэж байна.