Цэцэрлэгийн бүртгэлийн хүсэлтийг өнөөдрөөс /2024.08.01/ emongolia болон esis боловсролын салбарын мэдээллийн системээр дамжуулан хүлээн авч эхэллээ.

2024-2025 оны хичээлийн жилд улсын хэмжээнд 292,359 хүүхэд цэцэрлэгт хамрагдах хэрэгцээ үүссэн байна. Тэднээс 142,150 хүүхэд нь нийслэлд хамаарна.

Нийслэлийн хүүхдийг насаар нь харуулбал:

• 2 настай-30894
• 3 настай-35055
• 4 настай-37204
• 5 настай-38997 хүүхэд байна.

Иргэд хүүхдээ цэцэрлэгт хамруулах үйлчилгээг авахдаа дараах зүйлсийг анхаарахыг Боловсролын ерөнхий газраас сануулж байна. Үүнд,

• Өөрийн болон хүүхдийнхээ хаягийн бүртгэл, мэдээллийг нягталж, баталгаажуулсан байх
• Таны хүүхэд өнгөрсөн жил цэцэрлэгт хамрагдсан бол тухайн цэцэрлэгтээ “Үргэлжлүүлж явах” эсэх сонголтыг хийх
• Хэрвээ шилжилт хөдөлгөөн хийх бол 2024 оны наймдугаар сарын 12-оос өмнө баталгаажуулсан байх
• Хэрвээ E-Mongolia-р дамжуулан цэцэрлэгийн бүртгэлийн хүсэлт явуулах боломжгүй бол өөрт ойрхон цэцэрлэг дээр ажиллаж буй ажлын багт наймдугаар сарын 12-ны өдрөөс эхлэн хандаж зөвлөгөө, дэмжлэг авах боломжтой.

Өнгөрсөн жилийн тухайд бүртгэлийг хоёр үе шаттай зохион байгуулсан. Ингэхдээ хүсэлтийг цахимаар болон гэрийн ойролцоох төрийн өмчийн цэцэрлэгт хандан гаргаж байсан юм.

Эцэг, эхчүүд нийслэлийн хамран сургах тойргийн мэдээллийг Нийслэлийн боловсролын газрын сайт, пэйж хуудас болон утсаар авах боломжтой.

Монгол Улсад 2021-2022 онд цэцэрлэгийн хамрагдалт 76 хувьтай байжээ. Харин 2022-2023 оны хичээлийн жилд 90.2 хувь болж, 20 орчим хувиар нэмэгдсэн эерэг үр дүн гарсан. Энэ хугацаанд шинээр 197 сургууль, 285 цэцэрлэг ашиглалтад орсон байна.

Мөн ирэх жилүүдэд шинээр 11 цэцэрлэг, долоон сургууль, есөн сургууль, цэцэрлэгийн цогцолбор барьж ашиглалтад оруулахаар ажиллаж байгаа аж.