Нью-Йорк, Пентагон зэрэгт 2001 оны есдүгээр сарын 11-нд террорист үйл ажиллагааг зохион байгуулсан гэх Халид Шейх Мохаммед болон өөр хоёр яллагдагч нартай тохиролцоонд хүрсэн гэж АНУ-ын Батлан хамгаалах яам мэдэгдэв.

"KSM" гэж нэрлэгддэг Халид Шейх Мохаммедыг 2003 онд террорист гэмт хэрэг үйлдсэн хэргээр Пакистан улсад баривчилжээ.  Дараа нь 2008 онд хуйвалдаан, дайны хуулийг зөрчин алах, энгийн иргэд рүү халдах, иргэний обьект руу халдлага үйлдэх, бие махбодид хүнд гэмтэл санаатай учруулах, дайны хуулийг зөрчин эд хөрөнгө сүйтгэх, терроризм, терроризмд материаллаг дэмжлэг үзүүлэх зэрэг гэмт хэрэгт буруутгасан байдаг.

АНУ-ын зүгээс Мохаммедэд цаазаар авах ял оноохоор зүйлчлээд байсан. Гэхдээ Пентагоны зүгээс террорист хуйвалдаанд оролцсон гэдгээ хүлээн зөвшөөрөх юм бол цаазын ялыг бүх насаар нь хорих ял болгон өөрчилнө гэх саналыг тавьсан байна. Яллагдагч нар саналыг хүлээн авснаар гэмт хэрэг үйлдсэн гэдгээ хүлээн зөвшөөрсөн гэж "The New York Times" мэдээллээ.

Осама бин Ладены талаар нийтлэл бичсэн "CNN"-ийн үндэсний аюулгүй байдлын шинжээч Питер Берген "Засгийн газар сүүлийн 20 гаруй жилийн турш эдгээр гэмт хэрэгтнүүдийг яллах ажиллагааг удаашруулж байсан. Гэхдээ тэдэнд бүх насаар нь хорих ялыг оноох болсон нь бүх цаг үеийн хамгийн муу шийдвэр гэж хэлмээр байна" гэжээ.

Мохаммед тэргүүтэй яллагдагч нарын шүүх хурал 20 жилийн турш хүлээгдэж байсны гол учир нь 2000 онд тэднийг Тагнуулын төв хорооны нууц шоронд эрүүдэн шүүж байсан гэх хэргээс болсон. Тодруулбал, тухайн үед яллагдагч нарыг эрүүдэн шүүснээр хуулийн дагуу үйл ажиллагааг явуулаагүй гэж шүүх шинжилгээний байгууллага үзэж, эрүү шүүлтээр тулган авсан мэдүүлгийг шүүхэд ашиглахгүй гэж прокурорууд үзэж байсантай холбоотой юм.

Эх сурвалж:CNN