Парисын олимпийн 3х3 сагсан бөмбөгийн тэмцээн тун сонирхолтой өрнөж байна. Тэмцээний хоёр дахь өдөр дэлхийн аварга Сербийн эрэгтэй шигшээ баг болон олимп, дэлхийн аварга АНУ-ын эмэгтэй шигшээ баг тоглолтоо хийв.

Эхний өдөр АНУ-ын хүчирхэг багийг хожсон Страхиня Стоячич, Деян Майстрович тэргүүтэй Сербийн шигшээ энэ удаад Хятадын эсрэг тоглолоо. Магадгүй энэ олимпод оролцож буй хамгийн чансаа доогуур гэгдэх Хятадын шигшээ баг дэлхийн тэргүүн багийг 21-15 гэсэн харьцаатай хожиж, шуугиан тарилаа. Токиогийн олимпоос хойш 3х3 сагсан бөмбөгтөө хөрөнгө оруулж, анхаарал хандуулсан хятадууд эцэст нь үр дүнгээ үзэж байх шиг. Тэдний алсын зайн шидэлтүүд онцгой байж, Сербийн шилдгүүдэд боломж олгосонгүй.

Нөгөө талд олимп, дэлхийн аварга АНУ-ын эмэгтэй шигшээ баг олимпод анх удаагаа өрсөлдөж буй Азербайжантай учраа таарав. Бүрэлдэхүүндээ хоёр америк тоглогчидтой Азербайжан тоглолтын эхнээс онооны тэргүүллийг авч, гүйцэгдсэнгүй. Цагтаа WNBA-д тоглож явсан Тиффани Хэйес эх орныхоо эсрэг сайн тоглолтыг үзүүлж, АНУ-ын багийг буулган авлаа. Ийнхүү олимпийн аваргаа хамгаалагч АНУ-ын эмэгтэй шигшээ баг хоёр өдрийн дараах байдлаар хоёр хожигдолтой болж, хүндхэн нөхцөл байдалд орлоо.

Эрэгтэй, эмэгтэй тус бүр найман улсын шигшээ баг өрсөлдөж буй. Тэд хэсгийн шатанд хоорондоо тус бүр нэг удаа тоглож, хамгийн өндөр амжилттай дөрвөн баг нь хасагдах шатанд шалгарах учиртай.

Тоглолтуудын үр дүнг танилцуулъя.

Эрэгтэй

• Польш 19 – 17 АНУ
• Франц 21 – Литви
• Хятад 21 – 15 Серби
• Латви 21 – 12 Нидерланд

Эмэгтэй

• Азербайжан 20 – 17 АНУ
• Испани 17 – 12 Франц
• Канад 21 – 11 Хятад
• Австрали 21 – 19 Герман

Хоёр өдрийн дараах байдлаар Канадын эмэгтэй шигшээ баг тун сайн байгаа харагдана. Дэлхийн чансааг тэргүүлэгч ихэр эгч дүүс Мишель Плуфф болон Катерин Плуффтэй тэд Австрали, Хятадыг буулган аваад байна. Харин эрэгтэй багууд дундаас эзэн орон Францын шигшээ баг хожигдолгүй явна. Тэд эхний өдөр Польшийг, хоёр дахь өдөр Литвийг хожжээ.