Цагтаа NBA-ийн бүх одод болж, лигт өндрөөр үнэлэгдэж явсан Луол Денг өдгөө төрөлх эх орныхоо төлөө хоёргүй сэтгэлээр зүтгэж, бүхнээ зориулж байна. Хуучнаар Суданы Вау хотод мэндэлсэн Луол Денг багадаа Египет, Лондон гэсээр Нью Жерсид хүрч, NBA-д орсон билээ.

Авьяасаа үнэлүүлж, хийдгээ хийчихсэн Луол Денг өдгөө Өмнөд Суданд сагсан бөмбөгийг хөгжүүлэх үйлст гар бие оролцож, шигшээ багаа дагуулан Парисын олимпод оролцож байна. Тэд өнгөрсөн Ням гаригт Пуэрто Рикогийн эсрэг хэсгийн эхний тоглолтоо хийж, 90-79 гэсэн харьцаатай ялалт байгуулсан юм. Энэ нь тэдний олимпийн наадмын түүхэн дэх анхны ялалт байв.

Өмнөд Судан 2011 онд тусгаар тогтнолоо зарласан.

Өмнөд Суданы дасгалжуулагч Рояаль Айви "Бидэнд заал, бэлтгэлийн бааз болон бусад бусад барилга байгууламж байхгүй. Бид Руандад хэцүү бэлтгэл хийсэн. Тэндээсээ Испани руу аялж, олон газраар явж, олон цагийн нислэгийг давлаа. Хүмүүсийн ярьдаггүй зүйл гэж бий. Чадад бидний нислэг долоон цагаар хойшилсон гэдгийг хүмүүс мэдэхгүй" гэв. Тэрбээр Луол Денгийн талаар "Луол Денг дөрвөн жил биднийг санхүүжүүллээ. Тэр заал, зочид буудал, онгоцны тасалбар гээд бүхний төлбөрийг төлдөг. Луол болон арын албаныхандаа талархмаар байна. Тэдэнгүйгээр бид энэ багийг хамтад нь нэгтгэж чадахгүй байсан" гэжээ.

Өмнөд Суданы сагсан бөмбөгийн шигшээ баг өнөөдөр АНУ-ын хүчирхэг багийн эсрэг тоглоно. Хоёр баг саяхан бэлтгэлийн тоглолт хийхэд 101-100 гэсэн харьцаатай АНУ хожсон билээ. Гэхдээ тоглолтын турш Өмнөд Суданы залуучууд илүүрхсэн гэхэд хилсдэхгүй.

Луол Денг NBA-д 15 улирлыг өнгөрүүлэхдээ Чикаго Буллс, Майами Хит, Кливленд Кавальерс, Лэйкерс, Миннесота Тимберволвес зэрэг багуудад тоглож, 166.1 сая ам.долларын цалин авчээ. Өдгөө тэрбээр Өмнөд Суданы сагсан бөмбөгийн холбооны ерөнхийлөгчөөр ажиллахаас гадна шигшээ багийн туслах дасгалжуулагчийн үүргийг гүйцэтгэж байна. Түүний ачаар Өмнөд Судан улс анхны битүү дээвэртэй заалаа барьж байгаа гэнэ.