Парисын олимп өдөр бүр л дуулиан шуугиантай, сонирхолтой үйл явдал дүүрэн болж байна. Өчигдөр/2024.07.30/ л гэхэд эзэн орны сагсан бөмбөгийн шигшээ баг Ази тивийн төлөөлөл Японд хожигдох дөхөв. Акацүки гэж нэрлэгддэг Японы шигшээ баг тоглолтыг сайн эхлүүлж, дөрвөн үе оноогоор ойрхон явсан. Дөрөвдүгээр үеийн төгсгөлд дөрвөн оноо илүү гарч, бараг л Францыг хожиж, дэлхий нийтийг цочрооход ойртсон байлаа. Гэвч тооны харьцаа 84-80 гэж Япон илүү байхад Францын Матью Стразел алсын зайн шидэлтийг алдаатай гүйцэтгэж, оноог 84-84 гэж тэнцүүлсэн. Улмаар нэмэлт цагт Францын шигшээ баг өндөр нурууныхаа илүүгээр хүчтэй өрсөлдөгчөө буулган авчээ.

Хэн ч Японы шигшээ багийг Францын хүчирхэг багийг ийм нөхцөл байдалд оруулж, ойрхон өрсөлдөөнийг үзүүлнэ гэж таамаглаагүй. Энэ өдрийн гол од нь Японы Юки Кавамүра байлаа. Ердөө 172 см өндөртэй тэрбээр энэ олимпод түрүүлэх зорилготой Францын эсрэг 29 оноо авчээ. Хамгийн сонирхолтой нь Японы багийн гол хүн Рүи Хачимүра тоглолтын үеэр хөөгдөж, багаа хүнд байдалтай орхисон юм.

Тоглолтын дараа франц тоглогч Николя Батум "Бид энэ тоглолтыг амар гэж бодоогүй. Дасгалжуулагч ч үүнийг хэлсэн. Япон амар бууж өгдөг баг биш. Найм, арван оноо дутуу явсан ч эргэн ирэх аргаа олдог баг. Үүнийгээ ч өнөөдөр харууллаа" гэв. Түүнд Кавамүра гүн сэтгэгдэл төрүүлжээ. Түүний талаар Батум "Тэр гайхалтай. Үүнийг нь ч өөрт нь хэлсэн. Олимп бол сагсан бөмбөгийн хамгийн том тайз. Түүн шиг галзуу тоглолтыг үзүүлдэг хэн нэгэн үргэлж гарч ирдэг. Түүний өмнөөс баяртай байна. Гэхдээ хожсондоо баяртай байна. Тэр бол гайхалтай залуу" гэжээ.

Өдгөө 23 настай Кавамүра Парисын олимпийн дараа Америкийг зорьж, Мемфис Гриззлис багийн бэлтгэлд хамрагдана. Тэнд өөрийгөө баталж харуулвал ирэх улирал NBA-д тоглох боломжтой. Гол асуудал нь түүний нурууны өндөр. 172 см гэдэг бол орчин цагийн мэргэжлийн сагсан бөмбөгт ялангуяа NBA-д дэндүү намхандаа орно. Гэхдээ л Батум түүнийг NBA-д харна гэж итгэж байна. Батум "Тэр үнэхээр сайн сагсан бөмбөг тоглодог. Яагаад NBA-д орж чадахгүй гэж" гэжээ.