Арилжааны банкууд ипотекийн зээл олголтоо зогсоосон гэх мэдээлэл иргэдийн шүүмжлэлийг дагуулаад буй. Тодруулбал, УИХ-ын 2024 оны сонгуулийн өмнө ипотекийн зээлийн санхүүжилтийг 500 тэрбум төгрөгөөр нэмэгдүүлж, арилжааны банкнууд руу эх үүсвэрийг шилжүүлснээр 10 хоногт ипотекийн зээл олголт 42 хувиар өсч байсан. Түүнчлэн өмнөх оны мөн үетэй харьцуулахад 59 хувиар өссөн эерэг үр дүн гарсан гэдгийг албаныхан мэдээлж байв. Тэгвэл өнөөдрийн байдлаар ипотекийн зээл олголт үнэхээр зогссон уу, нөхцөл байдал ямар байгаа талаар арилжааны банкнуудаас тодрууллаа.

Монгол Улсад хамгийн томд тооцогдох Хаан банк ипотекийн зээлийг иргэдэд хэвийн олгож байна. УИХ-ын 2024 оны сонгуулийн үед ипотекийн зээлийн эх үүсвэр нэмэгдсэнээс шалтгаалан ачаалал ихтэй байсан бол өнөөдрийн байдлаар оргил ачааллын үеийг давж чадсан гэв. Тиймээс өмнөх оны мөн үетэй адил хэвийн ачаалалтай ажиллаж байна. Зээлийн хүсэлтүүд дарааллын дагуу шийдвэрлэгдэж байгаа бөгөөд шинээр хүсэлт өгөх иргэд ипотекийн зээлийн хүсэлт хүлээн авах боломжтой салбаруудад хандах боломжтой.

Түүнчлэн иргэдийн ихээр үйлчлүүлдэг Төрийн банк, Худалдаа хөгжлийн банк, Голомт банкинд ипотекийн зээл хэвийн олгож байгаа бөгөөд банк бүрийн зээлийн хүсэлтийн хүлээлгийн хугацаа өөр байдаг аж. Сүүлийн саруудад зээлийн хүсэлт ихээр хүлээж авсантай холбоотойгоор зээлийн хүсэлтийг харьцангуй урт хугацаанд шийдвэрлэж, хүлээгдэж байгааг мэргэжилтнүүд нь мэдээллээ.

Арилжааны банкнуудын ипотекийн зээлийн хэмжээ дунджаар 160 сая, хугацаа 360 сар байна. Мөн 2024 оны нэгдүгээр сарын 1-ээс дөрөвдүгээр сарын 30 буюу ипотекийн санхүүжилтийн эх үүсвэр нэмэгдэхээс өмнө зээл олголт нийслэлд 245 зээлдэгч, орон нутагт 149 зээлдэгчид ипотекийн зээл олгожээ. Харин Хуримтлалын сангаас эх үүсвэр нэмэгдүүлэх шийдвэр гарсан тавдугаар сарын 1-17-ны хооронд нийслэлд 353, орон нутагт 227 зээлдэгчид зээл олгожээ. Тодруулбал, энэ он гарснаас хойш тавдугаар сарын 17-ны байдлаар 3361 өрхөд 397.3 тэрбум төгрөгийн зээл олгосон байдаг.

Үүнээс Улаанбаатар хотод 267.3 тэрбум төгрөгийн зээлийг 2082 өрхөд, 130 тэрбум төгрөгийн зээлийг 1279 өрхөд олгожээ. Энэ нь өмнөх оны мөн үеийнхтэй харьцуулахад 60 орчим хувиар өссөн үзүүлэлт гэдгийг төв банк мэдээлж байсан юм. Энэ оны хувьд нийтдээ 1.2 их наяд төгрөгийг ипотекийн зээлэнд зарцуулах юм.