"Даншиг наадам-Хүрээ цам" наадам наймдугаар сарын 3-4-ний өдрүүдэд Хүй долоо нудагт болно. Уг наадам Монголын соёл, шашны зан үйл, өв уламжлалыг хадгалсан, өвөрмөц онцлогтой, аялал жуулчлалын бүтээгдэхүүн болгон хөгжүүлж олон улсын жуулчдыг татах ач холбогдолтой юм.

Наадамд монгол туургатан ОХУ-ын Буриад, Өвөр монголын хүчит бөхчүүд ирж оролцох юм байна.

Үндэсний бөхийн барилдаанд 256 хүчит бөх зодоглож, буриад болон өвөрмонгол бөхөөр тус бүр 64 хүчтэн барилдах аж. Түүнчлэн лам нарын дунд ном хаялцах, балин урлалын тэмцээн, унзад, голч нарын тэмцээн зохиогддог ба Очирваанийн тахилга, Чингис хааны сан, цам харайх, сор залах, шашны сүлд дуулал эгшиглүүлэх үйл ажиллагаа болох ажээ.