Самар, тэр дундаа газрын самраас харшилтай хүүхдүүдийн тоо жил бүр өсч байна. Хэрэв харшил нь хөдөлсөн бол амь нас эрсдэх аюултай тул олон улсын судлаачид хэрхэн газрын самраас харшлахгүй байх аргыг судалж иржээ.

Тэгвэл Австрали улс самрын харшлын эсрэг, дархлаа тогтоох эмчилгээг хийж эхэлснээр анхдагч орон болж, олон сая хүүхдийг аварч чадна гэдэгтээ итгэлтэй байна. Сүүлийн үеийн судалгаагаар 10 хүүхэд тутмын нэг нь самрын харшилтай. Эмчилгээнд сонгогдсон самрын харшилтай нялх хүүхдүүд хоёр жилийн турш эмнэлгийн хяналт дор өдөр бүр самрын нунтаг бага хэмжээгээр хэрэглэх юм. Аюулгүй байдлыг харгалзан үзэн, аажим аажмаар хүүхдүүдэд өгөх нунтгийн хэмжээг нэмэх юм байна.

Самрын дархлаа тогтоох эмчилгээний эмнэл зүйн туршилтууд үр дүнтэй болох нь тогтоогдсон тул самрын харшлын эсрэг эмчилгээг анх удаа баталж, эхлүүлжээ.

Эрүүл мэндийн яамны туслах сайд Гед Кирни "Бид энэ аймшигт харшлыг зогсоож чадна гэдэгтээ итгэлтэй байна" гэж хэлсэн. Зарим хүнсний гаралтай харшлууд сургуулийн насны хүүхдүүдэд түгээмэл байдаг бол самрын харшил нь нялх хүүхдүүдэд илрэх хамгийн өндөр магадлалтай харшилд ордог. Самрын харшлын эсрэг эмчилгээ үнэ төлбөргүй байх бөгөөд 12 сараас доош насны хүүхдүүд хамрагдах боломжтой.

Эмчилгээ хэдийн эхэлсэн бөгөөд Вестмиад хүүхдийн эмнэлгийн харшлын эмч Лара Форд "Самар, газрын самрын харшилтай гэр бүлийн хамгийн их санаа зовдог асуудлын нэг бол гэнэт харшил нь хөдлөх явдал юм. Энэ эмчилгээ айдсыг арилгах болно. Өдөрт өгөх самрын нунтгийн тунг нарийвчлан тооцоолдог тул айх айдас байхгүй" гэж тайлбарлажээ.

Хэдийгээр эмчилгээ хийж эхэлсэн ч гэрийн нөхцөлд эцэг эх нь дур мэдэн хүүхдүүдэд самрын тос өгөхгүй байхыг анхааруулсан байна.

Эх сурвалж:BBC