Парисын олимпийн жүдо бөхийн төрөл тун сонирхолтой үргэлжилж байна. Өчигдөр/2024.07.30/, өнөөдрийн эрэгтэй, эмэгтэй дөрвөн жинд Монголын тамирчид эрхээ авч чадаагүй ч сүүлийн хоёр өдөр дөрвөн тамирчин өрсөлдөх хуваарьтай. Өчигдөр болсон эрэгтэйчүүдийн -81 кг болон эмэгтэйчүүдийн -63 кг-ын барилдаанууд тун сонирхолтой болж өнгөрлөө. Ялангуяа эмэгтэйчүүдийн -63 кг-ын жинд Мексикийн жүдоч Приска Авити Алькараз гэх хэний ч таамагт байгаагүй 28 настай тамирчин финалд хүрч, мөнгөн медалийн эзэн болжээ. Түүний талаар дэлхий даяар шуугьж, Мексикийн спортын түүхэн дэх анхны олимпийн медальтай жүдоч болов.

Жүдо сонирхогчид Приска Авити Алькаразын нэрийг үе, үе сонссон нь лавтай. Тэрбээр Гранд Слам, Гран При тэмцээнээс нэг мөнгө, хоёр хүрэл медаль хүртэж байсан нэгэн. Сүүлд л гэхэд Загребын Гран Пригээс хүрэл медаль хүртсэн аж. Мөн 2023 оны дэлхийн аваргын тавдугаар байрын шагналтай. Харин Америк тивдээ бол хүчтэй өрсөлдөгч. Панамерикийн наадам, нээлттэй тэмцээн, аварга шалгаруулах тэмцээнээс алт, мөнгө, хүрэл медальтай.

Жиндээ дэлхийн чансааны 18 дугаарт эрэмблэгдэж буй Приска Авити Алькараз өчигдөр эхний тойрогтоо дүрвэгсдийн багийн Нигара Шахиныг, дараа нь дэлхийн аваргын мөнгөн медальт Польшийн залуу од Шиманьская Ангеликаг тус, тус ялж хэсгийн аваргын төлөө шалгарчээ. Ийнхүү В хэсгийн аваргын төлөө Австрийн Любяна Пиовесанаг ялж, хагас шигшээд шалгарав. Түүний сугалаа ч тун таатай байсан аж. Энэ жингийн гол өрсөлдөгчид болох Францын Кларисс Агбеньену болон Словенийн Андрей Лески нарын сугалаа зөрж, отгон дэлхийн аварга Нидерландын Хоанне Ван Лисхут хэсгийн шатанд ялагдаж, тэмцээнээ өндөрлүүлэв.

Хагас шигшээд Приска Авити Алькараз Хорватын Катари Кристотой учраа таарч, ялснаар финалд үлджээ. Олимпоор нэг од нь гүйчихсэн, "салхилчилсан" хүнийг зогсооно гэдэг амаргүй. Ялангуяа олимпийн жүдод хэний ч таамагт байгаагүй, төсөөлөөгүй жүдоч түрүүлсэн, медалийн тавцанд зогссон түүх дэндүү олон. Энэ ч утгаараа Приска Авити Алькараз буухиаг үргэлжлүүлсэн. Гэхдээ үнсгэлжингийн үлгэр финалд ялагдлаар дуусах хувьтай байжээ. Словенийн алдарт бөх Андрей Лески түүнийг иппон үнэлгээгээр ялж, олимпийн алтан медаль хүртэв. Угтаа барилдааныг эхлэлд Приска Авити Алькараз вазари үнэлгээ авч, илүү эхлүүлсэн ч Лески туршлага зааж, цэвэр даржээ.

Энэ жингийн хүрэл медалиудыг Францын алдарт аварга, амаржаад удаагүй байгаа Кларисс Агбеньену болон Косовогийн шинэ залуу од Фазлью Лаура нар хүртжээ.

Приска Авити Алькаразын талаар товчхон танилцуулахад түүний аав Кени, ээж Мексик гаралтай бөгөөд тэрбээр Лондон хотод төрж, өсчээ. Тэрбээр Их Британийн нэрийн өмнөөс олимпод оролцох хүсэлтэй байсан ч дотоодын өрсөлдөөн чанга байсан учир иргэншлээ солих шийдлийг сонгов. Энэ талаараа Приска "Их Британид миний жингийн өрсөлдөөн чанга байсан. Би үнэхээр сэтгэлээр унасан. Бараг л бууж өгсөн. Тэр үед дасгалжуулагч минь Мексикийн иргэншилтэй болж болох эсэхийг минь асуусан" гэв.

Улмаар 2017 онд 21 насандаа Приска Мексикийн нэрийн өмнөөс олон улсын тэмцээн уралдаанд орж эхэлжээ. Хамгийн гол нь түүний испани хэл тийм ч сайн биш гэнэ. Тиймээс Мексикийн жүдо бөхийн холбоотой харилцахад хүндрэл гардаг байв. Уг нь тэрбээр жүдо гэхээсээ илүүтэйгээр гимнастикт дуртай байсан ч түүний ах Филип жүдогоор хичээллэж, дүүгээ уруу татжээ. Ахынхаа талаар Приска "Миний ах бол Гранд Сламын медальтай, дэлхийн аваргад өрсөлдөж байсан хүн. Надад бол урам зориг өгсөн нэгэн. Түүнийг л биширч, шүтэж өслөө. Түүн шиг, түүнээс ч илүү амжилт гаргахыг би хүссэн" гэв.

Филип Авити-Алькараз нь Их Британийн нэрийн өмнөөс барилддаг бөгөөд Гранд Слам, Гран Пригээс гурван хүрэл медаль хүртсэн амжилттай.

Приска Авити Алькараз нь анх Токиогийн олимпод оролцсон ч эхний тойрогтоо Монголын тамирчин Б.Ганхайчид ялагдаж байлаа. Гэхдээ түүний Америк тив дэх ялалтын буухиа тасраагүй. Түүний зорилго нь жүдогоор дамжуулан латин-америк, мексик охидод урам зориг өгөх. Энэ талаараа тэрбээр "Бид хүчтэй, дайчид байж чадна. Мексик бол эмэгтэйчүүд гэртээ л байх ёстой гэж уламжлалтай орон. Манай аав, ээжийн найзууд одоо ч тийм соёлтой. Гэхдээ нэг үеэ бодвол эрчүүд хоол хийж, үүрэг хариуцлагаас үүрдэг болсон. Соёл аажим аажмаар эрх тэгш болж байна" гэжээ.