Монголын боксын түүхэн дэх олимпийн анхны эмэгтэй медальтан төрөхөд ганцхан ялалт үлдлээ. Парисын олимпийн эмэгтэйчүүдийн -54 кг-ын жинд өрсөлдөж буй М.Энхжаргал өчигдөр/2024.07.30/ хоёр дахь тулаанаа хийв. Өдгөө 25 настай тэрбээр эхний тулаандаа Италийн Сирине Чарабиг 5-0 гэж илт илүүрхэж, эхний ялалтаа авсан. Харин өчигдөр хоёр дахь тулаанаа 2022 оны дэлхийн аваргын мөнгөн медальт, Румыны тамирчин Ленута Лакрамиоара Периоктой хийж, 4-1 гэсэн харьцаатай ялалт байгуулжээ.

Одоо түүнийг Туркийн Хатиче Акбаш гэх боксчин хүлээж байна. Хоёр тамирчны хэн нь ялсан нь хагас шигшээд шалгарч, хүрэл медалийн болзол хангана. Тэгвэл Хатиче Акбаш гэж хэн бэ?

Хатиче Акбаш нь 2002 оны нэгдүгээр сарын 1-ний өдөр Анкара хотод мэндэлжээ. Түүний аав Керем Акбаш 2010 онд Туркийн боксын аварга болж байсан гэнэ. Улмаар Малатья хотод боксын клуб байгуулж, Хатиче есөн настай байхдаа аавынхаа нөлөөгөөр боксоор хичээллэж эхэлсэн аж. Тэрбээр анх 2016 онд Туркт болсон Европын залуучуудын боксын аваргад түрүүлжээ. Үүний дараа 2022 онд Хорватад болсон Европын 22 хүртэлх насны аваргад мөн түрүүлсэн амжилттай.

Сонирхогчийн боксын замналдаа олон улсад 16 тулаан хийж, 13 ялж, гурав ялагдсан үзүүлэлттэй. 2022 оноос хойш тун сайн амжилтыг үзүүлж байгаа харагдав. Тухайлбал, 2022 онд эх орондоо болсон сонирхогчийн боксын дэлхийн аваргын финалд өнөөх Румыны Ленута Лакрамиоара Периоктой таарч, ялсан аж. Мөн газар дундын тэнгисийн наадамд түрүүлж, 2023 оны Европын наадмаас хүрэл медаль хүртжээ.

Сонирхолтой нь М.Энхжаргалын ялсан хоёр тамирчин болох Италийн Сирине Чараби болон Румыны Ленута Лакрамиоара Периок нар хоёулаа Хатиче Акбаштай Европын наадамд учраа таарч байжээ. Ингэхдээ Хатиче Акбаш Италийн Сирине Чарабиг ялсан ч хагас шигшээд Румыны Ленута Лакрамиоара Периокт ялагдсан гэнэ.

Румыны Ленута Лакрамиоара Периокыг илүүрхэж чадсан М.Энхжаргал Туркийн Хатиче Акбашийг илүүрхэх боломж бий.

М.Энхжаргал болон Хатиче Акбаш нар тун сонирхолтой, чухал тулаан маргааш/2024.08.01/ 23:20 цагт болно. Монгол Улс 2021 оны Токиогийн олимпод анхны эмэгтэй боксчноо оролцуулж байсан бол гурван жилийн дараа анхны медальтантай болох боломж гарч ирлээ.