Засгийн газрын хуралдаанаар өнгөрсөн хавар Гурилыг импортын татвараас чөлөөлөх тухай хуулийн төслийг УИХ-аар хэлэлцэж баталсан. Уг хууль нь 2024 оны тавдугаар сарын 1-нээс хэрэгжинэ гэдгийг ЗГХЭГ-ын дарга асан Д.Амарбаясгалан мэдэгдэж байсан юм. Энэ хууль хэрэгжиж эхэлснээр нэг кг гурилын үнэ 1600 төгрөг буюу 50 хувиар буурах боломжтой" гэдгийг хэлж байв. Гэвч хууль хэрэгжээд гурван сар болсон ч гурилын үнэ 50 хувиар буурсангүй. Худалдаа эрхлэгчдийн зүгээс орос, монгол гурилыг 300 төгрөгийн зөрүүтэй худалдаж байгааг хэлж байв. Тэдний хувьд зах зээл дээр орос гурил орж ирснээр дотооддоо үйлдвэрлэж буй гурилын үнэ 50 хувь буурсангүй гэв.

Монголд үйлдвэрлэсэн хамгийн хямд үнэтэй дээд гурил нэг кг нь 2800 төгрөг бол орос дээд гурил 2500 төгрөгийн үнэтэй байна.

ИРГЭД ИХЭВЧЛЭН 10 КГ-ААС ДООШ ГУРИЛ ХУДАЛДАН АВДАГ

"Содон бөмбөгөр" худалдааны төвийн өргөн хэрэглээний бараа бүтээгдэхүүн болон хүнсний бүтээгдэхүүн зардаг хэсэг үдийн хойно хөл багатай сэлүүхэн байж таарав. Худалдагч нар тусын тусынхаа лангуунд утсаа оролдон, зарим нь хоорондоо элдвийг ярилцан хажуугаар нь зөрөх хүмүүсийг царайчлангуй харж зогсоно. Тус худалдааны төвийн гурил будааны хоёр лангуугаар ганц нэг хүн худалдаа хийж харагдав. Жижиг зайтай лангуун дээр гурил, будаа, давс, сахар, ургамлын тос, хоол амтлагч зэргийг нямбайлан өрж, үнийг нь нэгбүрчлэн наасан байлаа.

Баяр наадмын дараа ихэнх иргэд хөдөө, орон нутгийг зорьж, амардаг учраас худалдан авалт тааруу болдог гэнэ. Худалдаа эрхлэгчдийн хувьд олсон хэдэн төгрөгөөрөө түрээсээ төлж, амьдралдаа зарцуулаад таардаг гэв. Харин хичээл сургууль эхэлж, намраас л иргэдийн худалдан авалт сайжирдаг байна. Иргэдийн хувьд хүнсээ бага багаар бэлдэж, худалдан авалт хийдэг.

Жишээлбэл, иргэд ихэвчлэн 10 кг-аас доош гурил худалдан авдаг бол 25, 50 кг-ийн шуудай гурилыг ресторан, цайны газар гэх мэт үйлчилгээний газрууд л худалдан авдаг байна.

ИРГЭД: ГУРИЛ ГЭХЭЭСЭЭ ИЛҮҮ БЭЛЭН ГУРИЛАН БҮТЭЭГДЭХҮҮНД ИХ МӨНГӨ ЗАРЦУУЛДАГ

Зарим худалдан авагчдын хувьд гурилын үнэ буурсан эсэхийг мэдэхгүй, анзаардаггүй гэх хариултыг өгч байв. Иргэн Б.Баттулгын хувьд ам бүл тавуулаа. Эднийх сардаа нэг удаа хүнсээ базааж, бэлтгэдэг бөгөөд 10 кг гурилаас илүүг худалдан авдаггүй. Ажил төрөлтэй болохоос гурил гэхээсээ илүү бэлэн гурилан бүтээгдэхүүнд их мөнгө зарцуулдаг гэдгийг хэлсэн юм.

Хүнсний зах болон томоохон сүлжээ дэлгүүрүүдэд дотооддоо үйлдвэрлэсэн дээдийн дээд гурил 3900-4000 төгрөг, дээд гурил нь 2500-2800 төгрөг, нэгдүгээр гурил нь 2100-2500 төгрөгийн үнэтэй байна.

Харин импортын цагаан будааны хувьд 3200-4500 төгрөгийн үнэтэй худалдаж байна. Үндэсний статистикийн хорооны мэдээгээр нэгдүгээр зэргийн гурилын дундаж үнэ 2024 оны зургадугаар сард 2466 төгрөг болж, 2022 оны мөн үеэс 80.1 хувиар, 2023 оны мөн үеэс 7.9 хувиар, өмнөх сараас 0.5 хувиар (12 төгрөгөөр) тус тус өссөн үзүүлэлт гарсан гэж мэдээлж байсан юм.

"ГУРИЛАН БҮТЭЭГДЭХҮҮНҮҮДИЙН ҮНЭ БУУРЧ, ДАГААД ИНФЛЯЦИ БУУРНА" 

ЗГХЭГ-ын дарга асан Д.Амарбаясгалан 2024 оны тавдугаар сарын 1-нд Засгийн газрын хуралдаанаас гаргасан шийдвэрүүдийг танилцуулж байв. Тэрбээр тухайн үед "Гурил, малын тэжээлийг гаалиар татваргүй оруулж ирэх тогтоол батлагдлаа. Ингэснээр өнөөдрөөс эхлээд Монгол Улсын хилээр гурил, малын тэжээл татваргүй орж ирэхээр боллоо.

Хүнсний аюулгүй байдлын зөвлөл хуралдаж, импортын улаан буудайн гуриланд квот тогтоохгүй гэсэн шийдвэр гаргасан.

Ингэснээр гурилын үнэ 50 орчим хувиар буурахаар харагдаж байгаа. Гурилын үнэ буурснаар хэрэглээний сагсанд байгаа гурилан бүтээгдэхүүнүүдийн үнэ буурч, дагаад инфляци буурна" гэдгийг мэдэгдэж байсан юм.