Украины цэргийн тагнуулын алба баруун Африкийн Мали улсад Оросын Вагнер группийн цэргүүдийн аминд хүрсэн отолтод оролцсон гэж Киев мэдэгдлээ.  Вагнер групп албан ёсны Telegram суваг дээрээ өнгөрсөн долоо хоногт Мали дахь тулалдааны үеэр их хэмжээний хохирол амссан гэж Даваа гаригт мэдэгдсэн.

Тодруулбал, Вагнер болон Малийн зэвсэгт хүчин хамтран таван өдрийн турш хүнд зэвсэг, нисгэгчгүй онгоц, амиа золиослогч бөмбөгдөгчдийг ашигласан Туарегийн салан тусгаарлах хүчин болон жихад бүлэглэлийн эвслийн эсрэг ширүүн тулаан хийжээ. Тулааны үеэр Вагнер группийн олон тооны цэргүүд болон тэдний командлагч Сергей Шевченко амь үрэгдсэн аж.  Украины цэргийн тагнуулын ГУР агентлагийн хэвлэлийн төлөөлөгч Андрей Юсов "Оросын дайны гэмт хэрэгтнүүдийн эсрэг амжилттай цэргийн ажиллагаа явуулах шаардлагатай мэдээллийг босогчид олж авсан" гэж Даваа гаригт мэдэгджээ.

Тэрбээр Вагнер группийн эсрэг цэргийн ажиллагаанд Украин оролцсон эсэх талаар тодорхой тайлбар өгөөгүй. Мөн энэ талаар өндөр нууцлалтай байгаа тул ирээдүйд боломжтой үе тохиовол тодорхой мэдээлэл өгөх болно гэж сэтгүүлчдэд хариулсан байна.

Мали улсын засгийн газар сүүлийн арав гаруй жилийн турш хойд нутгийн босогчтой тэмцэж байгаа бөгөөд 2020 оноос хойш Вагнер групптэй хамтран ажиллаж буй. Өнгөрсөн жилийн тавдугаар сард Малид байрлах Вагнер группт АНУ хориг арга хэмжээ авсан байдаг. Учир нь тус бүлэглэл Украинд түрэмгийлж буй Оросыг зэвсгээр дэмжиж байна гэж үзсэн юм. Киевийн эрх баригчид Малид болсон тулаанд Украиныг буруутгаж буй.

Учир нь Мали дэх эх сурвалжууд салан тусгаарлагчид Украины төрийн далбааг барьсан байсан гэж мэдээлжээ.

Вагнер групп Суданд мөн цэргийн үйл ажиллагаа явуулдаг бөгөөд тэнд Украины хөлсний цэргүүд байрлаж байгаа талаар Киев мэдээлэв. Энэ талаар Украины Аюулгүй байдал, хамтын ажиллагааны төвийн захирал Серхи Кузанаас тодруулахад "Вагнерын байгаа Африкийн орнууд Москвагийн хувьд алт, очир алмааз, байгалийн хий, газрын тос зэрэг баялгийг эзэмших боломжийг олгодог ашиг сонирхлын бүс бөгөөд мөнгө нь Оросын түрэмгийллийг санхүүжүүлэхэд зарцуулагддаг. Тиймээс дайныг санхүүжүүлж буй бүлэглэлүүдийг буулгаж авах нь Украины зорилго учир ямар ч тохиолдол Вагнерыг устгахыг зорих нь тодорхой" гэжээ.

Эх сурвалж: GUARDIAN