Энэтхэгийн ерөнхий сайд Нарендра Моди ирэх наймдугаар сард Украин руу айлчлахаар төлөвлөж байна. Энэхүү айлчлал нь 2022 онд Орос Украин руу түрэмгийлснээс хойш хийж буй анхны айлчлал болно гэж Энэтхэгийн орон нутгийн хэвлэлээр мэдээлжээ. Тус улсын засгийн газрын албаны эх сурвалж хэлэхдээ ирэх наймдугаар сарын 23-нд айлчилж магадгүй байна.

Энэтхэг улс нь Оростой урт хугацааны хамтрагчид байсан төдийгүй ерөнхий сайд Моди нь Путины "үнэнч анд" гэж нэрлэгддэг. Гэхдээ Моди өмнө нь Путинтэй уулзахдаа Украинд амь эрсдэж буй гэм зэмгүй хүүхдүүдийг их өрөвдөж, тэдний өмнөөс зовж байна гэж хэлж байжээ. Зеленский тэдний харилцааг буруутгадаг бөгөөд өөрийн цахим хуудас дээрээ "Москвагийн цуст гэмт хэрэгтнийг дэлхийн хамгийн олон хүн амтай, ардчилсан нийгмийн удирдагч тэвэрч буйд сэтгэл дундуур байна" гэж нийтэлж байв.

Өнгөрсөн жилийн "Их-7" бүлгийн дээд хэмжээний уулзалтад Украин, Энэтхэгийн удирдагчид оролцсон юм. Тухайн үед Зеленский ерөнхий сайд Модид хандаж, Энэтхэг улс бол дайныг зогсоох гол хүчин зүйлүүдийн нэг гэдгийг илэрхийлж байжээ. Хэрэв ирэх сард Моди Украин руу айлчлах нь батлагдвал дэлхий нийт тэдний уулзалт, Оросын хариу үйлдлийг ажиглах юм. Энэ жил Энэтхэгийн сонгуульд Моди дахин ялалт байгуулсан бөгөөд олон улсын түвшинд төвийг сахисан байр суурьтай байхаа амласан байдаг. Тиймдээ ч өөрийн байр суурийг хадгалан Украин болон Оросын хооронд энх тайвны гүүр болж магадгүйг шинжээчид онцлоод байна.

Эх сурвалж: NHK