Мэргэжлийн сүмогийн Нагоя башёд түрүүлж, дээд зиндааны арав дахь түрүүгээ хүртсэн Тэрүнофүжи Г.Ган-Эрдэнэ уламжлал ёсоор түрүү бөхийн хэвлэлийн бага хуралдаа оролцлоо. Өдгөө 32 настай тэрбээр Нагоя башёг илт тасархай тэргүүлж байсан ч сүүлийн өдрүүдэд дараалан ялагдаж, эцэст нь нэмэлт барилдаанд Таканошог ялснаар түрүүлсэн юм. Түүний хувьд башёгийн өрсөлдөөн улам ширүүсч, түрүүлэхэд хэцүү болсон гэнэ.

Ёкозүна Тэрүнофүжи Г.Ган-Эрдэнэ "Одоогийн бөхчүүд улам хүчтэй болчихсон санагддаг. Тэдэнтэй барилддаг учраас би мэдээд байна. Нэг үеэ бодвол бөхчүүдийн бэлтгэл сургуулилалт, хандлага сайжирсан учраас хэн нь ч башёд түрүүлэх боломжтой болжээ. Хүмүүс биднийг дэвжээн дээр хангалттай хичээж барилддаггүй гэж ярих нь надад таалагддаггүй. Хүн бүр л дор бүрнээ хичээж байгаа" гэв.

Сүмогийн ертөнцөд Тэрүнофүжи шиг зовлон, жаргал үзсэн бөх үгүй. Нэг хэсэг озэки цол хүртэж, мандаж явсан тэрбээр бэртэл, гэмтлийн улмаас цолоо хураалгаж, доод зиндаанд хүртэл барилдаж байсан үе саяхан. Гэвч эцэст нь оргил өөд дахин мацаж, их аварга болсон түүхтэй. Одоог хүртэл түүний нуруу, хоёр өвдөгний бэртэл бүрэн илааршаагүй гэж ярьдаг. Гэхдээ л шүд зуун тэвчиж, ёкозүнагийн үүргээ хангалттай биелүүж байгаа нэгэн.

Тэрүнофүжи үргэлжлүүлэн "Хааяа би замналынхаа хамгийн оргил үе дээрээ байна уу гэж өөртөө эргэлздэг. Гэхдээ өмнөхөөсөө ялгаатай нь би бэлтгэл дээр ч, башё дээр ч бүрэн дүүрэн ялна гэсэн итгэл надад алга" гэжээ.

Бэлтгэл, сургуулилалтыг яс хийдэг гэгддэг Тэрүнофүжи ёкозүна цол хүртэх боломжтой бөхийг нэрлэхийг хүссэнгүй. Тэрбээр "Бид дараагийн ёкозүнагийн талаар бодоод хэрэггүй байх. Хэн сайн байгаа нь л тэр цолонд хүрнэ" гэлээ.