Парисын олимпийн эрэгтэйчүүдийн гимнастикийн багийн шигшээ тэмцээн өчигдөр/2024.07.29/ боллоо. Шигшээ тэмцээний гол өрсөлдөөн Хятад болон Японы хооронд өрнөж, Хятадын баг бүтэн 3.267 оноогоор илүү гарч, олимпийн аварга бараг л болчихсон, тун баяртай байв.

Хятадын эрэгтэйчүүдийн баг 2012 оны Лондонгийн олимпоос хойш багийн төрөлд түрүүлж үзээгүй яваа аж.

Гэвч Хятадын сүүлийн хоёр тамирчны нэг болох Су Вэйдэ турникийн дасгал дээр хоёр ч удаа унаж, 11.600 оноо авсан юм. Олдсон боломжийг япончууд алдсангүй. Японы багийн ахлагч Хашимото бараг л төгс үзүүлбэрийг толилуулж, 14.566 оноо авснаар Японы баг түрүүлэх болзлоо хангасан юм.

Хашимото хоёрхон өдрийн өмнө суга савлуурын урьдчилсан шатанд бүтэлгүйтэж, шигшээд шалгарч чадаагүй билээ. Угтаа тэрбээр энэ төрлийн өнгөрсөн олимпийн аварга байжээ.

Шүүгчид Хашимотогийн дүн зарлах үед спортын ордон даяар чимээгүй болж, Хятад, Японы тамирчид руу бүхий л анхаарал чиглэв. Ийнхүү шүүгчид дүнгээ эцэслэж, танилцуулснаар Японы тамирчид баяр хөөрдөө умбаж, зарим нь нулимс унагааж байлаа. Харин Хятадын тамирчид гуниглаж, багаа хөөдсөн Су Вэйдэ ганцаараа буланд суугаа харагдсан. Бүтэн гурван оноо илүү байсан ч эцсийн мөчид алдаа гаргаж, алтан медалиа алдчихсан хэрэг.

Алтан медаль хүртсэн Хашимото "Эгзэгтэй мөч тохиолоо. Миний үзүүлбэр медалийн өнгийг шийдэх байлаа. Сүүлийн үзүүлбэртээ бэлдэх үеэр ‘Япон, Япон’ гэх үзэгчдийн уухайг сонссон. Энэ л надад өөдрөг байдлыг авчирлаа. Би газардах үеэрээ бага зэрэг гишгэсэн. Гэхдээ л үзэгчдээс тийм гайхалтай дэмжлэг авна гэдэг итгэмээргүй. Багаараа алтан медаль авах нь ганцаараа алтан медаль авахаасаа илүү гайхалтай мэдрэмжийг төрүүлж байна. Багийнхантайгаа болон бусад хүмүүстэй хүртэл баяраа хуваалцаж байна" гэжээ.

Харин багаа хөөдөж, тааруу үзүүлбэр үзүүлсэн Су Вэйдэ "Өнөөдрийн үйл явдал надад том сургамж боллоо. Бүхий л хүчээ дайчилсан багийнхнаасаа уучлалт гуймаар байна. Ялангуяа энэ цикльд олон бэртлийн даван туулсан хүмүүсээс уучлалт гуйя" гэв.

Японы баг 259.594 оноогоор алтан медаль хүртсэн бол Хятадын баг тэднээс ердөө 0.532 оноо дутуу мөнгөн медаль, АНУ 257.793 оноогоор хүрэл медаль хүртлээ.