Парисын олимпийн жүдо бөхийн тэмцээний гурав дахь өдрийн барилдаанууд өчигдөр/2024.07.29/ боллоо. Гурав дахь өдөр эрэгтэйчүүдийн -73 кг, эмэгтэйчүүдийн -57 кг-ын медальтнууд тодров. Монгол Улсаа төлөөлөн Б.Эрдэнэбаяр, Л.Энхрийлэн нар өрсөлдөж, дэлхийн шилдгүүдтэй эн тэнцүү өрсөлдөөнийг үзүүлжээ.

Эрэгтэйчүүдийн -73 кг-д Б.Эрдэнэбаяр эхний тойрогтоо дэлхийн аварга Швейцарийн Нилс Стампыг ялж, шуугиан тарьсан. Удаах тойрогтоо Испанийн Сальвадор Касес Рокаг мөн л илүүрхэв. Харин хэсгийн аваргын төлөө Молдавын Адил Османовд тахим буулгаж, дагах барилдаан хийхээр болсон. Түүнийг Японы алдарт бөх Соичи Хашимото хүлээж байлаа. Хүч шавхсан барилдааны эцэст торгуулиар Соичи Хашимото ялж, улмаар Косовагийн Акил Гжаковаг дийлэн хүрэл медаль хүртжээ.

Тэгвэл Л.Энхрийлэн хэсэгтээ мөн л шуугианыг тарив. Тэрбээр эхний тойрогтоо олимпийн аварга Косовагийн Нора Гжаковаг, удаах тойрогтоо Германы Паулине Старкийг тус тус ялж, хэсгийн аваргын төлөө Өмнөд Солонгосын Хух Мимитэй учраа таарав. Өмнө нь гурван удаа учраа таарахад Л.Энхрийлэн бүгдэд нь ялаад байсан ч олимпийн дэвжээ өөр аж. Хух Мимиг энэ удаад илүүрхэж, хагас шигшээд шалгарсан бол Л.Энхрийлэн дагахаар болсон. Харамсалтай нь дагах барилдаанд Гүржийн Этери Липартелианиг барсангүй. Монголын хоёр бөх хоёулаа долдугаар байраар олимпийн ганцаарчилсан төрлөө өндөрлүүллээ.

Эрэгтэйчүүдийн -73 кг-д Азербайжаны Хидаят Гейдаров түрүүлж, олимп, дэлхийн аварга гэх эрхэм хүндтэй цолны эзэн боллоо. Тэрбээр финалд эзэн орны залуу хүчирхэг бөх Жоан-Бенжамин Габаг ялсан юм. Харин хүрэл медалиудыг Соичи Хашимото болон Молдавын Адил Османов нар хүртжээ. Алтан медаль хүртсэн Хидаят Гейдаров ярихдаа "Өөрийн цуглуулгадаа олимпийн алт нэмлээ. Эх орноосоо тэр дундаа гэр бүлээсээ маш их дэмжлэгийг мэдэрлээ. Тэднийг намайг үзэж байсныг мэднэ. Энэ надад үнэхээр их зүйлийг өгүүлж байна. Энэ бол Азербайжаны ялалт. Ирэх 2028 оны Лос Анжелесын олимпод амжилтаа давтахын тулд бүхнээ дайчлах болно. Бид бол ялагч гүрний үр сад" гэжээ.

Эмэгтэйчүүдийн -57 кг-ын жинд Канадын Криста Дэгүчи түрүүлж, удаан хугацаанд хүсэн хүлээсэн олимпийн алтан медалиа хүртэв. Өдгөө 28 настай тэрбээр олимпод оролцохын төлөө, олимпийн медаль авахын тулд Японоос явж, Канадыг зорьсон. Гэвч Токиогийн олимпод оролцох эрхээ Жессика Климкейтэд алдаж, сэтгэл санаа нь хамгийн доод цэгтээ хүрсэн гэдэг. Гэхдээ бууж өгсөнгүй. Эргэн шилдгээ барилдаанаа үзүүлж, өнгөрсөн онд дэлхийн аварга болж, Парисын олимпод Канадыг төлөөлөх эрхээ олж авсан. Олимпийн финалд ч шинэхэн дэлхийн аварга Хух Мимиг ажиллагаагаараа илүүрхэж, Канад улсаас төрсөн анхны жүдогийн бөхийн олимпийн аварга боллоо.

Алтан медаль хүртсэн Криста Дэгүчи "Энд хүрэх урт замыг тууллаа. Би гурван настайдаа аяллаа эхлүүлсэн. Олимп үргэлж миний мөрөөдөл байсан. Токиогийн олимпийг өнжиж, гурван жил хүлээх урт байлаа. Ялангуяа ширүүн сонгон шалгаруулалтын үед. Медалийн буухиаг үргэлжлүүлсэндээ баяртай байна. Үнэндээ анхны медалийн өнгө ямар ч байсан болно гэж бодсон. Гэхдээ алтан медаль үнэхээр онцгой юм" гэжээ.

Дэгүчи Яманаши их сургуулийг төгссөн бөгөөд Японд амьдардаг. Японы дотоод өрсөлдөөн ширүүсч, боломж бага байсан учир Дэгүчи иргэншлээ солихоос өөр аргагүйд хүрсэн. Энэ талаараа тэрбээр "Миний аав канад хүн. Тэр Уиннипегээс гаралтай. Их сургуулийн оюутан байхдаа би хүнд үеийг туулсан. Бид Канадын талаар ярилцсан юм. Миний гэр бүл Канадад байдаг. Тэгээд л ‘Яагаад Канадын төлөө барилдаж болохгүй гэж’ бодол төрсөн. Би Канадын төлөө барилдахыг хүссэн" гэж Японы хэвлэлд яриа өгчээ.

Үргэлжлүүлэн тэрбээр "Японд байхдаа би шигшээ багийн бүрэлдэхүүнд байсан. Гэхдээ түрүүлж байсангүй. Гурав эсвэл тавдугаар байрт л ордог байсан. Тэр үед л өөрчлөлт хэрэгтэй юм байна гэж бодсон. Би Канадад өөрийгөө илүү хүчирхэг болно гэж бодсон. Канад ч миний эх орон" гэжээ.

Дашрамд сонирхуулахад, Криста Дэгүчид ялагдаж, мөнгөн медаль хүртсэн Хух Мимигийн ээж япон хүн. 21 настай тэрбээр Токио хотын Васэда их сургуулийн оюутан бөгөөд иргэншлээ сольж, аавынхаа эх орныхоо төлөө барилдах болсон юм.

Энэ жинд хүрэл медалийг Францын Сара Леони Сиске, Японы Харүка Фүнакүбо нар хүртсэн. Өөрөөр хэлбэл, Япон гаралтай гурван жүдоч алт, мөнгө, хүрэл медалийн эзэд болжээ.