Мөнгөөр аз жаргалыг худалдан авч болдог уу?. Энэхүү асуулт нь олон жилийн турш философич, эдийн засгийн мэргэжилтэн, сэтгэл зүйчдийн мэтгэлцэж байсан сэдэв юм. Урлагийн салбарт мөн адил хариултыг нь олон талаас харуулсан бүтээлүүд байдаг.

Notorious B.I.G-ийн 1997 онд гаргасан дуу болох “Mo Money Mo Problems” дээр "Бид их мөнгөтэй болох тусам асуудал улам нэмэгдэнэ" гэх хэсэг бий. Арван жилийн дараа Кание Уэстын "Good Life" дуу дээр "Мөнгөтэй байх нь бүгдийг авна гэсэн үг биш. Гэхдээ мөнгөгүй байсан ч ялгаагүй " гэх мөр байдаг. Тус хоёр мөртүүдээс иш татан авч үзвэл, мөнгөтэй байсан ч байгаагүй ч аз жаргал, баяр баяслыг мэдрэхгүй гэдгийг харж болно. Гэхдээ орлого нь тодорхой хэмжээгээр нэмэгдсэн ч аз жаргалтай амьдрахад саад болохгүй гэж үздэг хүмүүс ч байдаг.

Нийгмийн сэтгэл зүйч Элизабет Данн "Chasing life" подкастад оролцох үеэрээ онолын үүднээс тайлбар өгчээ. Тэрбээр "Мөнгө аз жаргалыг худалдаж авч чадахгүй гэсэн энэ ойлголт үнэхээр худал" гэсэн байна. Элизабет Даннын хувьд Канадын Бритиш Колумбын их сургуулийн сэтгэл судлалын тэнхимийн профессор бөгөөд мөнгө, эд хөрөнгөөс хүн хэр их таашаал авч болох чиглэлээр судалгаа хийдэг. Тэрбээр үргэлжлүүлэн "Мөнгөөр аз жаргалыг худалдаж авч болдог. Хэн нэгэн надад мөнгөнөөс аз жаргал мэдэрч чадахгүй гэж хэлэх юм бол зүгээр л авдаг хэмжээнээсээ илүү мөнгө аваад үз гэж хэлдэг" гэжээ.

"CNN" агентлаг 2010 оны есдүгээр сард нийтэлсэн судалгаанд ойролцоогоор жилд 75,000 ам.долларын орлоготой хүмүүс илүү аз жаргалтай амьдардаг болох нь тогтоогдсон.

Гэхдээ 2023 онд нийтлэгдсэн судалгаанд дурдсанаар, аз жаргалтай хүмүүс цаг хугацааны явцад байгаа хөрөнгөдөө сэтгэл хангалуун бус болдог нь тогтоогдсон байна. Жишээлбэл, шинэ машин, шинэ цүнх авахад төрдөг баяр жаргалтай мэдрэмж нь удалгүй буурч, хэвийн үзэгдэл мэт санагдахыг хэлнэ.

Эд хөрөнгөнөөс олж авах баяр баясал, аз жаргал өөрсдийн гэсэн тодорхойгүй хугацаатай байдаг аж. Професоор Данн "Маш алдартай нэгэн судалгаа гарсан. Үүнийг энгийн үгээр тайлбарлавал, сугалаанаас их хэмжээний мөнгө хожсон ч аз жаргалтай болохгүй гэж тухайн судалгаанд нийтлэгдсэн байсан. Үнэн хэрэгтээ энэ судалгаанд баримт нотолгоо маш бага. Сугалаанаас мөнгө хожвол аз жаргалын түвшин огцом нэмэгддэг бөгөөд хэдэн жил ч үргэлжилж болно. Тиймээс дан ганц мөнгөтэй болоод аз заргалтай болох биш урт хугацаанд үргэлжлэх баяр баяслын мэдрэмжийг авч байх нь жинхэнэ аз жаргал болохыг олж тогтоосон" гэжээ.

Тиймээс профессор Данн судалгааны явцад хэрхэн мөнгөөр урт хугацааны аз жаргалыг авч, мэдэрч болохыг олж тогтоосон байна.

ЭД ХӨРӨНГӨ БУС ТУРШЛАГА ХУДАЛДАЖ АВ

Судалгаанд хамрагдсан хүмүүс бараа материал худалдаж аваад дээд тал нь хоёр сарын хугацаанд тухайн зүйлээсээ баяр баясал, аз жаргалыг мэдэрчээ. Харин аялалд гарч, очиж үзээгүй газраа очсон хүмүүс зарцуулсан мөнгөндөө харамсалгүй, урт хугацаанд аз жаргалтай байсан нь тогтоогдсон. Тиймээс мөнгөө туршлага, дурсамж бүтээхэд зарцуулахыг профессор Данн зөвлөсөн байна.

Тэрбээр "Ихэнх тохиолдол шинэ зүйл худалдаж авах баяр баясал маш хурдан хугацаанд арилдаг. Бид материаллаг эд зүйлс, буйдан, байшин зэрэг худалдаж авахаас илүү их аз жаргалыг авч чадна. Миний хэлэх гэсэн гол санаа нь хийж үзээгүй зүйлдээ мөнгө зарцуул. Наад зах нь орж үзээгүй тансаг ресторанд орж, идэж үзээгүй зүйлээ идээд үз" гэжээ.

ӨӨРИЙГӨӨ УРАМШУУЛ

Хүн зарим талаараа ямар ч бодлогогүйгээр мөнгө үрдэг дадал зуршилтай болсон байдаг. Үүнээсээ аз жаргалыг мэдрэхгүй байх нь элбэг. Тиймээс дуртай зүйлээ бодлогогүйгээр худалдаж авалгүй хэсэг хугацаанд завсарлага авахыг профессор Данн зөвлөжээ. Тэрбээр хэлэхдээ "Хүн байнга авдаг зүйлээсээ аз жаргал авдаггүй. Тиймээс хэсэг хугацаанд худалдан авалтын дадал зуршлаасаа салах хэрэгтэй. Ингэснээр дараа нь худалдан авалт хийхдээ бодлоготой хандаж, аз жаргалыг мэдэрч чаддаг болно" гэв. Жишээ нь өдөр бүр авдаг кофе нэг л өдөр сэтгэл нийцэхээ болино. Үүнийг даван туулахын тулд хэсэг хугацаанд кофе уухгүй байх хэрэгтэй юм.

        ЦАГ ХУГАЦААГ ХУДАЛДАН АВ

Энэ нь өөртөө илүү их цаг зав гаргах үйлчилгээг худалдан авах явдал юм. Профессор Данн хэлэхдээ "Үнэхээр хийж чадахгүй, дургүй зүйлээ хийж цаг заваа гарздаж байхаар яг хэрэгтэй үйлчилгээг чинь үзүүлж чадах үйлчилгээг худалдан авснаар өөртөө цаг гаргаж, бусад аз жаргалыг өгдөг зүйлдээ анхаарлаа хандуулах явдал юм. Судалгаанд оролцсон хүмүүс дунд туршилт явуулахад өөртөө цаг гаргаж чаддаг хүнээр нь мөнгө төлж хийлгэсэн хүмүүс бусдаас хавь илүү сэтгэл хангалуун байсан" гэжээ.

Мөнгөөр аз жаргал худалдан авах хамгийн орхигдсон арга нь цаг заваа өөртөө ашиглах аж.

БУСДАД  БЭЛЭГЛЭ

Эргэн тойрны хүмүүстээ бэлэг өгөх нь хүнийг аз жаргалтай болгодог нь тогтоогджээ. Мөн бусдад хандив өгснөөр тухайн хүндээ тусалж буйн илрэл юм. Данн хэлэхдээ, "Хэн нэгэн хэрэгтэй хүнд тусалж, тэр хүндээ бэлэг өгөх нь сэтгэлийг баяр баясгалантай болгодог. Танихгүй хүнээ хоолонд дааж, найз нөхдөдөө дэмжлэг үзүүлсэн хүмүүс бусдаас илүү өөртөө итгэлтэй аз жаргалтай байгаа нь нотлогдсон. Тиймээс хий хоосон худалдан авалтаас илүү өөртөө зөв замаар ашиг олж, бусдад тусламж үзүүлж аз жаргалтай болох хэрэгтэй.

Хэрэв та профессор Данны ярилцлагыг сонсохыг хүсвэл ЭНД дарна уу.

Эх сурвалж: CNN