Японы жүдоч Нацүми Цүнода Парисын олимпоос алтан медаль хүртэж, зорилгодоо хүрсэн. Тэрбээр жүдо бөхийн эмэгтэйчүүдийн -48 кг-ын жингийн финалд Б.Баасанхүүг дийлсэн билээ. 31 насандаа анхны олимпдоо оролцож, зуны олимпийн түүхэн дэх Японы 500 дахь медалийг авчирсан Цүнода ярихдаа "Дасгалжуулагч маань баяртай байгаад баярлаж байна. Би олимпод оролцох юм сан гэж удаан хугацаанд зорьсон" гэв.

Дэлхийн гурван удаагийн Нацүми Цүнода эмэгтэйчүүдийн -48 кг-ын жинд түрүүлснээрээ 2004 оны Афины олимпийн аварга Рёоко Танигаас хойш энэ жинд түрүүлсэн анхны япон жүдоч болж байна.

Анх Цүнода эмэгтэйчүүдийн -52 кг-д өрсөлддөг байсан ч Үта Абэ гарч ирснээр түүний цаг үе өнгөрч, жин буурч -48 кг-д өрсөлдөхөөс өөр аргагүй болсон билээ. Олимпийн талаар тэрбээр ярихдаа "Барилдааны үеэр миний хөдөлгөөн төдийлөн сайн байсангүй. Үүнийг маань өрсөлдөгчид давуу талаа болгоно гэж бодсон. Гэхдээ эцсээ хүртэл өөртөө итгэж чадлаа" гэв.

Цүнодагийн алтан медаль хүртэлх зам амар байгаагүй. Тэрбээр хэсгийн аваргын төлөө эзэн орны хүчтэй өрсөлдөгч Ширин Буклиг, хагас шигшээд Шведийн шилдэг залуу тамирчин Тара Бабулфатыг, финалд дэлхийн аварга Б.Баасанхүүг тус тус ялсан юм. Өрсөлдөгчдийнхөө талаар Цүнода "Энгийн тэмцээнтэй харьцуулахад өөр байлаа. Би дарамт, түгшүүр их мэдэрлээ. Гэхдээ өөрийгөө нэг шат ахиулж, төлөвшиж чадсан гэж бодож байна. Би олимпийн аварга болох зорилгоо умартсан байсан. Харин одоо биелүүлж чадсандаа баяртай байна" гэлээ.

Удахгүй 32 нас хүрэх Цүнода ийнхүү анхны олимпдоо оролцож, анхны медалиа авлаа. Одоо түүнд барилдах жил олон үлдсэн гэж жүдо сонирхогчид бодохгүй байна. Учир нь түүнийг орлохоор Вакана Кога, Кано Мияаки, Хикари Ёшиока тэргүүтэй дөнгөж 20 нас хүрч буй залуучууд бэлтгэгдэж буй.

Мөн энэ олимпоор шуугиан тарьсан хүн бол Рюүжү Нагаяама. Түүний Испанийн жүдоч Франциско Гарригостой хийсэн барилдаан асуудал дагуулсан бөгөөд Гарригосыг өрсөлдөгчөө боон ялалт байгуулсан гэж үзсэн юм. Гэвч үүнтэй Нагаяама санал нийлээгүй. Улмаар тэрбээр дагах барилдаан хийн хүрэл медаль хүртсэн. Энэ талаар Нагаяама "Тэр ялагдлын дараа бодлоо цэгцлэхэд хэцүү байсан. Гэхдээ намайг дэмжихээр аав, ээж минь ирчихсэн байлаа. Гэртээ хоосон харьж чадахгүй байсан болохоор хүрэл медалийн төлөө зүтгэсэн. Миний зорилго алтан медаль л байсан. Гэхдээ ээж, аав, эхнэр, гэр бүлээ хараад медальтай буцахын тулд бүхнээ дайчилсан" гэжээ.

Японы жүдо бөхийн холбоо ч Нагаяама болон Гарригосын барилдаантай холбогдуулан бичгээр гомдол гаргажээ. Гэхдээ сэтгэлд хүрсэн хариултаа авч чадаагүй гэнэ.