Нийслэлийн Баянгол дүүргийн хоёрдугаар хорооны нутаг дэвсгэрт байрлах Рокмон барилгын хажуугийн авто зогсоол дээр ОХУ-д цэргийн зориулалттай үйлдвэрлэгдсэн 9*18 мм-ын голчтой, их бие болон замагийн 204420**** дугаартай байлдааны зориулалттай гол төмөр гар аргаар суурилуулсан галт зэвсгийг хууль бусаар олж авсан, хадгалсан, бусдад худалдан борлуулахыг завдсан хэрэг гарсан.

Тус хэргээр иргэн Н.Б-д долдугаар сарын 08-ны өдөр Монгол улсын Эрүүгийн хуулийн тусгай ангийн 20.4 дүгээр зүйлийн 1 дэх хэсэгт зааснаар эрүүгийн хэрэг үүсгэн мөрдөн шалгах ажиллагаа явуулжээ.

Мөрдөн шалгах ажиллагааны үр дүнд долдугаар сарын 24-ний өдөр шүүхэд шилжүүлэх саналтай Баянгол дүүргийн прокурорын газарт хүргүүлсэн байна. Цагдаагийн байгууллага өнгөрсөн долоо хоногт буюу долдугаар сарын 22-ны өдрөөс долдугаар сарын 26-ны өдрүүдэд хэрэг бүртгэлтийн 34.318, мөрдөн байцаалтын 2.853 хэрэгт мөрдөн шалгах ажиллагаа явуулж “Шүүхэд шилжүүлэх саналтай” Прокурорын байгууллагад 371 хэргийг хүргүүлсэн байна.