"Израилийн эзэмшилд байсан Голаны өндөрлөг дэх хөл бөмбөгийн талбайд пуужингийн цохилт өгсөн гол буруутан нь Хезболла" гэж Израилийн албан тушаалтнууд мэдэгджээ. Мөн халдлагын хариуг заавал өгөх болно гэдгээ амлав. Гэвч Ливанд төвтэй Хезболла бүлэглэл тус халдлагыг үйлдээгүй гэж мэдэгджээ.

Израилийн армийн хэвлэлийн төлөөлөгч Бямба гаригт хэлэхдээ, "Хезболла" бүлэглэлийн пуужингийн довтолгооны улмаас 10 хүн амиа алдсан. Тэдгээр амиа алдсан хүмүүсийн талаас илүү хувь нь хөл бөмбөг тоглож байсан хүүхдүүд бөгөөд өөр 20 гаруй хүн шархадсан гэж мэдэгдлээ.

Тус улсын ерөнхий сайд Беньямин Нетаньяхугийн ажлын алба мөн адил мэдэгдэл гаргаж,  “Израиль энэ аллагыг зүгээр өнгөрүүлэхгүй. Хезболла заавал томоохон төлөөс төлөх болно" гэсэн байна.

Хезболла бүлгийн хувьд энэ үйл явдалтай огт хамаагүй бөгөөд худал гүтгэлгийг зүгээр өнгөрөөхгүй гэсэн байна. Газын зурвас дахь Хамас болон Израилийн дайн үргэлжилж байгаа энэ үед Хезболла мөн адил оролцох болсон. Учир нь Хезболла бүлгэм нь Хамастай эв санааны нэгдмэл байдлаа харуулахыг зорьж буй.

Цагаан ордны Үндэсний аюулгүй байдлын зөвлөл Бямба гаригт хийсэн мэдэгдэлдээ Хезболлагийн үйлдсэн байж болзошгүй халдлагыг буруутгасан. Үүнд "Израиль улсын аюулгүй байдалд ноцтой аюул заналхийлсээр байна. АНУ эдгээр аймшигт халдлагыг таслан зогсоох хүчин чармайлтыг үргэлжлүүлэн дэмжих болно. Израилийн аюулгүй байдлын төлөөх бидний үзүүлэх дэмжлэг нь Ливаны Хезболла бүлэгт хатуу арга хэмжээ авах явдал юм" гэжээ.

Эх сурвалж: NHK JAPAN