Италийн өндрийн харайлтын нэрт тамирчин Жанмарко Тамбери Парисын олимпийн нээлтэд улсынхаа далбааг барих хүндтэй үүргийг хүлээсэн нэгэн. Харамсалтай нь нээлтийн үеэр туг барьж байх үедээ хуримын бөгжөө Сена мөрөн рүү алдчихсан гэнэ. Өөрөөр хэлбэл, хуримын бөгж нь хуруунаас нь сугараад Сена рүү шидэгдчихсэн хэрэг.

Жанмарко Тамбери олимпийн наадамдаа бэлдэж, жин их хаясан учир бөгж нь хуруунаас нь сугарсан гэлээ.

Өдгөө 32 настай Токиогийн олимпийн аварга тэрбээр инстаграм хуудаснаа "Уучлаарай хайрт минь. Намайг уучлаарай. Хэрэв энэ бүхэн болох ёстой байсан бол, хэрэв би үнэхээр бөгжөө алдах ёстой байсан бол үүнээс илүү гайхалтай газар алдана гэж байхгүй. Хайрын хотын мөрөнд миний хайр үүрд үлдлээ" гэв.  Харин түүний эхнэр Чиара "Бидний бөгж, Парис хот хоёр үүрд хамтдаа байхаар боллоо. Одоо бид хуримын тангарагаа сэргээж, дахиад гэрлэх хэрэгтэй боллоо. Чи л ийм зүйлийг романтик болгож чадна даа" хэмээн хариулжээ.

Хосууд 2022 оны есдүгээр сард гэрлэлтээ батлуулжээ.

Жанмарко Тамберигийн Токиогийн олимпийн түүх мөн гайхалтай. Жанмарко болон Катарын Мутаз Эсса Баршим хоёр хоёулаа 2.37 метр харайн тэнцээд байсан юм. Мутаз Эсса Баршимд өмнөх амжилтаа ахиулах дахин нэг үсрэх боломж байсан ч тэрбээр Жанмаркотой хамт алтан медаль авахыг хүсч, зохион байгуулагчид ч хоёр тамирчинд хоёуланд алтан медаль зүүлгэсэн түүхтэй.