Олимпийн нээлт болохтой зэрэгцэн Францын цагдаа, сэргийлэх багууд төв гудамж талбайг хааж, бүх газрыг камержуулж, тамирчид, үзэгчдийн аюулгүй байдлыг дээд зэрэгт хамгаалжээ. Гэвч сайны хажуугаар саар гэгчээр үл таних хорлон сүйтгэгчид нийслэлээс зайдуу таван байршилд хорлон сүйтгэх ажиллагаа явуулсан байна.
Францын төрийн өмчит төмөр замын компани “SNCF”-ийн мэдээлснээр, хорлон сүйтгэгчид Баасан гаригийн 01:00-05:30 цагийн хооронд дохиоллын таван хайрцаг болон цахилгааны байгууламжийг эвдэхийг оролдсон байна.

Тус таван байршлын нэг нь Ле Мансаас зүүн тийш, Парисаас баруун өмнө зүгт 150 км зайд орших Курталайн хотод болсон байв. Хорлон сүйтгэгчид төмөр замын кабелийг шатаасан хэрэг гарснаас болж галт тэрэг зогсчээ. Үүний адил зүүн зүгт орших Мец, Кройсиллес хотын гадна орших Пагни-сюр-Мозель тосгонд гал түймэр, хулгайн гэмт хэрэг гарч, төмөр замын үйлчилгээг зогсооход хүрсэн аж.
Мөн Парис хүрэх төмөр замын хэд хэдэн уулзвар дээр кабель шатсан гэх мэдээлэл гарсан тул спортын наадмын нээлт болохоос өмнө асуудлыг шийдвэрлэхээр “SNFC” компанийн засварчид яаравчилжээ. “SNCF”-ийн тэргүүн Жан-Пьер Фаранду “ Энэ бол урьдчилан төлөвлөсөн, тооцоолсон, зохицуулалттай халдлага юм. Гэмтлийг янзлахын тулд ихээхэн засварын ажил шаардсан”  гэжээ.

Олимпийн нээлтийг үзэх гэсэн олон мянган зорчигчид Гаре Ду Норд, Гаре Монпарнассед гацсан. Мөн дан ганц нээлт үзэх гэсэн хүмүүс гэлтгүй олон улсын чиглэлийн төмөр замууд үйл ажиллагаагаа явуулах боломжгүй болжээ. Хорлон сүйтгэгчдийг хайж олох ажиллагаа эхэлсэн бөгөөд Францын засгийн газар гаднын нөлөөлөл олимпийг тасалдуулах гэж оролдсон гэж мэдэгдэв.
Тээврийн сайд Патрис Вергрие хэлэхдээ "Бүх зүйл гаднын нөлөөллөөр, санаатайгаар хорлон сүйтгэх гэж оролдсоныг харуулж байна. Яг нэг ижил цагт таван газар гал гарсан.  Хүмүүс зугтсаны дараа олдсон фургонууд, гал унтраагч бодисыг хэргийн газраас олдсон" гэв.

Эх сурвалж: CNN