Парисын олимп эхлээгүй байхад дуулиант хэрэг, скандалууд болжээ. Та бүхэндээ дэлгэрэнгүй мэдээллийг хүргэе.

АРХИ УУЖ, ТАМХИ ТАТСАН ШОКО МИЯАТА ОЛИМПООС ХАСАГДАВ

Японы уран гимнастикийн багийн ахлагч, 19 настай Шоко Мияатаг Парисын олимпод оролцуулахгүй гэж Японы гимнастикийн холбооноос мэдээллэв. Учир нь Мияата архи ууж, тамхи татсан гэнэ. Тэрбээр өнгөрсөн долоо хоногт Токио хотод эргэн иржээ. Шоко Мияата өнгөрсөн зургадугаар сард нэг удаа архи ууж, нэг удаа тамхи татсан гэдгээ баталсан аж.

Японы хуулиар 20 нас хүрээгүй бол архи, тамхи хориотой байдаг.

Японы олимпийн найдвар гэгдэж байсан Шоко Мияата сэтгэл зүйн таагүй байдал, дарамт зэргээс үүдэн архи ууж, тамхи татжээ. Олимп дөхөх үед түүнд асар их дарамт мэдрэгдсэн гэв. Мияата 2022 онд анхны дэлхийн аваргадаа оролцож хүрэл медаль хүртсэн. Энэ жил ч Японы уран гимнастикийн баг сайн байгаа учир 1964 оноос хойш тасраад байгаа гимнастикийн багийн төрлийн медалийн буухиаг залгуулна гэж итгэж байв.

КАНАДЫН ХӨЛБӨМБӨГИЙН ШИГШЭЭ БАГ ДАСГАЛЖУУЛАГЧ НУТАГ БУЦЛАА

Канадын хөлбөмбөгийн эмэгтэй шигшээ багийн ахлах дасгалжуулагч Бев Прьестман олимпоос хөөгджээ. Шалтгаан нь канадчууд өрсөлдөгч Шинэ Зеландын багийн хаалттай бэлтгэлийг нууцаар дрон ашиглан тагнасан аж. Үүний хариуцлагыг Бев Прьестман үүрч, нутаг буцаасан гэдгийг Канадын олимпийн хороо мэдэгдэв. Үүний дараа нэг ноцтой мэдээлэл гарсан нь Канадын хөлбөмбөгийн эрэгтэй, эмэгтэй шигшээ багууд сүүлийн жилүүдэд дрон ашиглаж, эсрэг багийнхаа бэлтгэлийг тагнаж, судалгаа хийдэг байсан гэлээ. Өнгөрсөн Токиогийн олимпод түрүүлэхдээ хүртэл Канадын эмэгтэй шигшээ баг энэ аргаа ашигласан гэх шуум гарчээ.

Канадын шигшээ баг олимпийн нээлтийн тоглолтдоо Шинэ Зеландыг 2-1 гэсэн харьцаатай хожжээ.

ШАРЛОТТ ДУЖАРДИН БАНДУУЛЖЭЭ

Олимпийн морин спортын аварга, Их Британийн тамирчин Шарлотт Дужардин олимпод оролцохгүй. Учир нь түүний морьтойгоо зүй бусаар харьцаж буй бичлэг ил болж, улмаар Олон улсын морин спортын холбооноос түүнийг олимпод оролцуулахгүй гэжээ. Өдгөө 39 настай Шарлотт Парисын олимпийн гол фаворитоор нэрлэгдэж байсан ч олимпод оролцохгүй боллоо. Тэрбээр өгсөн тайлбартаа "Болсон явдал бол миний морьдоо хэрхэн сургаж, шавь нараа хэрхэн дасгалжуулдгийг тодорхойлохгүй. Гэхдээ өөрийгөө өмөөрөх ямар ч шалтгаан байхгүй. Би маш их ичиж байна. Би илүү сайн үлгэр дуурайлал үзүүлэх ёстой байсан юм" гэв.