Гадаад харилцааны яам, “Хилийн чанад дахь монголчуудын зөвлөл” ТББ хамтран 2024 оны наймдугаар сарын 2-ны өдөр “Хилийн чанад дахь монголчуудын нэгдсэн чуулга уулзалт”-ыг Улаанбаатар хотод зохион байгуулахаар болжээ. Чуулга уулзалтаар Хилийн чанад дахь иргэд, гэр бүл, залуучуудын нийгмийн асуудлууд, монгол бахархал, өв соёл, гадаад сурталчилгаа болон спорт, урлагийн арга хэмжээ, өнөөгийн нөхцөл байдал, эх хэл, түүх, өв соёлын боловсрол, шинжлэх ухаан, технологи, инновацийн асуудлууд сэдвээр тус тус хэлэлцүүлэг өрнүүлж, нэгдсэн зөвлөмж гаргах юм байна.

Хилийн чанад дахь монголчуудын зөвлөлийн тэргүүн Б.Ганзориг:

-Одоогоор гадаадад 220 гаруй мянга монголчууд ажиллаж, амьдарч байна. Эдгээр иргэдийн санаачлагаар Хилийн чанад дахь монголчуудын зөвлөл төрийн бус байгууллага байгуулагдсан бөгөөд энэ жил 10 жилийн ой тохиож байна. Энэ хүрээнд наймдугаар сарын 2-5-ны хооронд гурван арга хэмжээг зохион байгуулна. Арван жилийн хугацаанд 47 орны, 170 гаруй холбоо, ТББ-ыг нэгтгэсэн.

Хилийн чанадад амьдарч байгаа иргэдийн эрх ашиг, эв нэгдлийг хамгаалах олон ажлыг зохион байгуулсан. Өнгөрсөн жилийн чуулга уулзалтыг Ерөнхийлөгчийн ивээл дор зохион байгуулсан. Энэ жил Гадаад харилцааны яам дэмжин ажиллахаар болсон.

Уг уулзалтад хилийн чанадад  оршин суугаа гишүүд ирж оролцоно. Мөн Монгол Улсаас гадаадад сурч, ажиллаж амьдрах хүсэлтэй иргэд ирж оролцдогоороо онцлог. Наймдугаар сарын 3-ны өдөр гишүүдийн нэгдсэн тавдугаар уулзалт болно.Үүнд дүрмийн шинэчлэл, дотоодын асуудал цаашдын төлөвлөгөөг хэлэлцүүлнэ. Энэ жил анх удаа "Diaspora Mongolia" фестивал зохион байгуулахаар болсон. Энэхүү арга хэмжээ наймдугаар сарын 4-ний өдөр Чойжин ламын сүм музейд болно. Diaspora гэдэг нь олон улсад өөрийн оршин суугаа улсаасаа бусад улсад 180-аас дээш хоног зорчиж, ажиллаж амьдардаг хүнийг нэрлэдэг. Олон улсын байгууллагуудтай хамтран ажиллана” гэв.