Парисын олимп өнөөдөр/2024.07.26/ нээлтээ хийнэ. Нээлтээсээ эхлээд л зуны 33 дахь олимп сонирхолтой болно. Олон сонирхолтой үйл явдал тохиож, дэлхий, олимпийн рекордууд эвдэгдэж, улс үндэстнээрээ уйлна, баярлана, омогшино. Гэхдээ үзэн ядах зүйлс ч мөн тохионо. Одоогийн байдлаар Парисын олимпоор хамгийн их үзэн ядагдаж буй тамирчнаар АНУ-ын сагсан бөмбөгийн шигшээ багийн тамирчин Жоэл Эмбийд тодроод байна.

Шалтгаан тун энгийн. Тэрбээр Франц улсын төлөө бус Америкийн төлөө олимпод оролцохыг хүссэн.

Саяхан АНУ-ын сагсан бөмбөгийн баг Лондонгоос Парис хотод хүрэлцэн ирсэн бөгөөд галт тэрэгний буудал дээр олон зуун хүн тэднийг тоссон. Энэ үеэр франц фэнүүд Эмбийдэд хандан "Паспортоо буцааж өг. Чи Францын төлөө тоглох ёстой байсан. Чи америк хүн биш шүү дээ" гэжээ. Эмбийд үнэхээр америк хүн биш. Гэхдээ бүр франц гаралтай ч биш. Тэрбээр Камерунд төрж, Европ руу волейбол тоглохоор явах гэж байсан ч 16 насандаа нутгийн ах Лук Мба Мутегийн ачаар Америк руу сагсан бөмбөг тоглохоор явсан нэгэн.

Жоэл Эмбийд өөрөө Францын иргэн болохыг хүссэн, хүссэндээ хүрсэн. 2022 онд тэрбээр Францын ерөнхийлөгч Эммануэль Макронд хандан бичсэн захидалдаа "Би Франц улсын иргэншил авч, цэнхэрүүдийн(Францын сагсан бөмбөгийн шигшээ багийн хоч) эгнээнд сонгогдмоор байна. Өөр шигшээ багт тоглохыг хүсэхгүй байна" гэж байжээ.

Францын нэрт сагсан бөмбөгчин Борис Диав ч энэ талаар ярихдаа "Жоэл бидэн дээр ирээд олон улсын түвшинд шигшээ багт сагсан бөмбөг тоглохыг хүсч байгаагаа хэлсэн. Тэр ялахыг, Францын төлөө тоглохыг, Францын хамтаар ялахаар хүссэн. Бид ч түүнийг сонссон" гэв.

Гэвч Эмбийд энэ оны эхээр АНУ-ын шигшээ багийн хамтаар Парисын олимпод оролцоно гэдгээ мэдэгдсэн. Түүний хүү Америкт төрсөн бөгөөд хүүгийнхээ төлөө алтан медаль авах хүсэлтэйгээ илэрхийлсэн юм. Тэрбээр шийдвэрийнхээ талаар "Гэр бүлийнхэнтэйгээ ярилцсаны эцэст АНУ-ын шигшээ багийг сонгохоор шийдлээ. Би NBA-д тоглодог ах дүүсийнхээ хамт тогломоор байна.

Би фэнүүдийнхээ төлөө тогломоор байна. Учир нь тэд намайг ирсэн анхны өдрөөс л гайхалтай байсан. Гэхдээ хамгийн чухал нь Америкт төрсөн хүүгээрээ бахархуулмаар байна. Миний хүү намайг түүний төлөө олимпод тоглосон гэдгийг мэдээсэй гэж хүссэн юм" гэжээ.

Мөн Эмбийд сүүлд өгсөн тайлбартаа "Миний гэр бүл одоо ч Камерунд байдаг. Би тэднийгээ асуудалд оруулмааргүй байна. Би тэднийг аюулгүй байлгахыг хүсч байна. Франц болон Камерун, Африкийн харилцаа ерөнхийдөө таатай биш.

Би бүүлүүлнэ гэдгээ мэдэж байна. Гэхдээ би дуртай байна. Ямар би анх удаагаа тийм нөхцөл байдалд орох биш" гэлээ.

ЛеБрон Жэймс, Стефен Көрри тэргүүтэй оддын цуглуулга АНУ-ын шигшээ баг олимпийн эхний тоглолтоо ирэх Ням гаригт Никола Йокич тэргүүтэй Сербийн эсрэг хийх болно. Харин Францын шигшээ баг маргааш/2024.07.27/ Бразилын эсрэг тоглоно.