Парисын олимпийн жүдо бөхийн тэмцээний сугалаа өчигдөр/2024.07.25/ болж, оноолт гарчээ. Таван тивийн 122 орны эрэгтэй 192, эмэгтэй 186 гээд нийт 378 жүдоч Парисын татамид шилдгээ тодруулах учиртай. Монгол Улсаа төлөөлөн арван жүдоч уран мэх, бяр хүчээ гайхуулна.

Парисын олимпийн жүдо бөхийн тэмцээн долдугаар сарын 27-ны 16.00 цагт эхэлнэ. Уламжлал ёсоор эмэгтэй -48 кг , эрэгтэй -60 кг-ын барилдаанууд болно.

• Эрэгтэй -60 кг

Дэлхийн аваргын мөнгөн медальт Э.Ариунболд эхний тойрогтоо Египетийн Сами Ёссритэй учраа таарав. Хэрэв ялвал дараагийн тойрогтоо Францын Лука Мхейдзетэй хүч үзнэ.

• Эрэгтэй -66 кг

Ё.Басхүү эхний тойрогтоо гоц мөргөв. Тэрбээр хоёрдугаар тойрогтоо Киргизстаны Кубанычбек Айбек Уулу болон Украины Богдан Ядов нарын ялсантай нь барилдана.

• Эрэгтэй -73 кг

Б.Эрдэнэбаяр эхний тойрогтоо Швейцарийн Нилс Стамптай учраа таарлаа.

• Эрэгтэй -100 кг

Б.Гончигсүрэн эхний тойрогтоо Израилийн Петер Пальчиктай учраа таарав. Эхний тойрогтоо чанга өрсөлдөгчтэй барилдахаар болжээ.

• Эрэгтэй +100 кг

О.Цэцэнцэнгэл эхний тойрогтоо Германы Эрик Абрамовтой учраа таарлаа. Хэрэв ялвал дараагийн тойрогтоо Тажикстаны Темур Рахимовтой барилдана.

• Эмэгтэй -48 кг

Дэлхийн аварга Б.Баасанхүү эхний тойрогтоо Мальтагийн Катрына Эспоситотой учраа таарчээ.

• Эмэгтэй -52 кг

Л.Сосорбарам эхний тойрогтоо Испанийн Ариане Торо Солертой барилдана. Хэрэв ялвал дараагийн тойрогтоо Унгарын Река Папптай хүч үзнэ.

• Эмэгтэй -57 кг

Л.Энхрийлэн эхний тойрогтоо Косовогийн Нора Гжаковатай учраа таарав.

• Эмэгтэй -78 кг

О.Хүслэн эхний тойрогтоо Эквадорын Чала Ванессатай барилдана. Хэрэв ялвал Израилийн Инбар Ланиртай татамид гарна.

• Эмэгтэй +78 кг

А.Адъяасүрэн эхний тойрогтоо Казахстаны Камила Берликаштай таарлаа. Хэрэв ялвал дараагийн тойрогтоо Туркийн Каяра Оздемиртай барилдана.

ОНООЛТЫН ТАЛААР

Ё.Басхүү, Б.Баасанхүү хоёрын оноолт, хэсгийн байдал тун таатай байна. Барилддаг барилдаанаа гаргаж, хийдэг зүйлсээ хийвэл олимпийн медаль ч хол биш аж. Б.Баасанхүүгийн жингийн гол өрсөлдөгчид болох Японы Нацүми Цүнадо болон Италийн Ассунта Скутто нар түүнээс зөрж, хоорондоо барилдах боломжтой. Л.Сосорбарам, Л.Энхрийлэн, Б.Гончигсүрэнгийн хэсэгт чанга өрсөлдөгчид бий. Хэсгээсээ шалгарч чадвал олимпийн медальд ойрхон. Мэдээж олимпод сул өрсөлдөгч, зорилгогүй тамирчин гэж үгүй. Бүгд л эх орон, ард түмнийхээ бахархлыг төрүүлэх гэж, омогшуулах гэж Парист ирсэн. Нэг салхивал хэний ч хүү, охин олимпод түрүүлж, дөрвөн жил алтан дугаартай зодоглож болдгийг бид хангалттай харсан. Тооцоонд, таамагт байгаагүй, түрүү бөхийн ярианаас хол явсан жүдоч таамаг эвдэж, төрийн дууллаа эгшиглүүлсэн тохиолдлуудыг бид сүүлийн жилүүдэд хангалттай харж буй.