Парисын олимпийн байт харвааны чансаа тогтоох харваа өчигдөр/2024.07.25/ боллоо. Монголын тамирчин Б.Отгонболд 72 сум харваж, 643 оноо авсан амжилтаараа 54 дүгээр байрт эрэмблэгдэв. Уг үзүүлэлтээрээ үндсэн шатны эхний тойрогтоо Мексикийн Матиас Грандетай учраа таарав. Өдгөө 20 настай Матиас чансаа тогтоох харваанд 679 оноо авч, 11 дүгээрт байрт жагсчээ.

Б.Отгонболд болон Матиас Гранде нарын халз харваа наймдугаар сарын 1-ний 15.30 цагт болно.

Ханжоугийн Азийн наадмын аварга Б.Отгонболд нь Токиогийн олимпод өрсөлдөж байсан туршлагатай нэгэн. Тухайн үед тэрбээр дэлхийн чансааны 147 дугаарт бичигдэж байв. Харин одоогийн байдлаар 50 дугаар байрт жагсч байна. Дэлхийг чансааг Бразилын Маркус Д’Алмейда тэргүүлж, Өмнөд Солонгосын Ким Вүжин, И Вү Сок, Туркийн Мете Газоз, Италийн Мауро Несполи нар удаалж байна.

Өмнөд Солонгосын харваач Лим Си-Хёон өчигдөр болсон чансаа тогтоох харваанд боломжит 720 онооноос 694 оноо авч, дэлхийн рекордыг тогтоожээ. Түүнээс өмнө мөн Өмнөд Солонгосын харваач Кан Чэ-Ён 2019 оны зургадугаар сард 692 оноо авч байжээ.