Сирийн ерөнхийлөгч Башар Аль-Асад Москвад айлчилж, ерөнхийлөгч Путинтэй уулзсан гэж Кремль мэдэгдэв. Гэхдээ айлчлалын талаар тодорхой мэдээлэл өгөөгүй байгаа тул Дамаск Анкара хоёрын харилцааг сэргээх асуудал байж болох юм.

Сирийн ерөнхийлөгч Ойрхи Дорнод даяар мөргөлдөөн улам хурцдаж байгаад санаа зовж байгаагаа илэрхийлсэн бөгөөд Орос, Турк, Беларусь зэрэг орнуудтай харилцаагаа сайжруулахыг зорьж байгаа бололтой.

Сири болон Оросын хувьд урт хугацааны найрсаг харилцаатай. Тухайлбал, Путин Сирийн ерөнхийлөгч Асадад зэвсгийн тусламж үзүүлдэг. Кремлийн нийтэлсэн видео бичлэгт Путин Асадаас Ойрхи Дорнод дахь мөргөлдөөний талаар санал бодлыг асуужээ. Тодруулбал, бичлэг дээр Путин "Харамсалтай нь хурцадмал байдал ажиглагдаж байна. Бид үүнийг харж байна. Энэ нь Сирид ч шууд хамаатай. Та бүхэн ямар цаг үеийг туулж байна вэ" гэж асуусан байна.

Асад харуйд нь "Хэцүү сорилтуудтай тулгарсан ч даван туулж чадсан. Өнөөдөр дэлхий болон Евразийн бүс нутагт болж буй бүх үйл явдлуудыг авч үзвэл өнөөдрийн бидний уулзалт маш чухал юм шиг санагдаж байна" гэж орос орчуулагчаар дамжуулан Путинд хэлжээ.

Энэхүү уулзалтаас өмнө Асад болон Туркийн ерөнхийлөгч Режеп Тайип Эрдоган нар 2011 оноос хойш тасарсан хоёр орны харилцааг сэргээхэд бэлэн байгаагаа мэдэгдэв. Эрдоган хэлэхдээ "Одоо бид Башар Аль-Асад Турктэй харилцаагаа сайжруулах алхам хиймэгц бид түүнд ижил арга барилаа харуулах болно" гэсэн юм.

Путин, Асад хоёр эртнээс холбоотон байсан бөгөөд 12 жил үргэлжилсэн бослого тэмцэл, иргэний дайны үеэр Сирийн байдлыг тогтворжуулахад тусалсан гэж Кремль тайлбарлаж байсан юм. Оросын дайчид Асадын цэргүүдэд томоохон газар нутгийг эргүүлэн авахад тусалсан. Мөн Сирид Оросын цэргийн бааз  байрласан хэвээр байна.

Эх сурвалж: DW