Хууль зүй дотоод хэргийн сайд О.Алтангэрэл өнөөдөр орой цагдаагийн байгууллагын удирдлага, мөн цагдаагийнхны эрүүдэн шүүлтийн улмаас амь нас нь хохирсон байж болзошгүй О -гийн ар гэрийнхнийг хүлээн авч уулзсан юм. Энэ талаар хохирогчийн өмгөөлөгч Г.Анхбаяр мэдээлэл өглөө.

Тэрбээр “Хууль зүй дотоод хэргийн сайд энэ хэрэг явдалтай холбоотойгоор дотоод албан шалгалт хийх талаар Цагдаагийн ерөнхий газрын дарга, Шүүхийн шийдвэр гүйцэтгэлийн ерөнхий газрын дарга нарт үүрэг өглөө.

Уг асуудлыг Авлигатай тэмцэх газар шалгаж байгаа учраас хэргийн талаар тодорхой мэдээлэл өгөх боломжгүй. Албан ёсоор бүх мэдээлэл шалгагдаад шүүх шинжилгээний дүгнэлт гарсны дараа мэдээлэл өгнө.

Цагдаагийн ерөнхий газраас өнөөдөр өглөө мэдээлэл хийх үеэрээ амь хохирогчийн хувийн нууцтай холбоотой асуудлыг мэдээлсэн нь хууль зөрчсөн болохыг Хууль зүй дотоод хэргийн сайд хэллээ.

Энэ асуудал дээр цагдаагийн удирдлага албан ёсоор тайлбар хийсэнгүй. Хуулиараа ар гэрээс нь зөвшөөрөл авч мэдээлэл хийх ёстой. Энэхүү хуулийн заалтыг хангаж ажиллах чиглэлээр тусад нь даалгавар өглөө сайд. Цагдаагийн ерөнхий газраас мэдээлэл хийхдээ амь хохирогчийн хувийн нууцтай холбоотой асуудлыг тодорхой дурдаад өмнө нь ял шийтгэгдэж байсан тухай мэдээлсэн.  Амь хохирсон ч хувийн нууцтай холбоотой асуудал байгаа. Энэ талаар ар гэрээс нь зөвшөөрөл авалгүйгээр мэдэгдэл хийсэн нь буруу. Хууль зөрчсөн үйлдэл болсон.

Цааш үргэлжлэх процессын тухайд шинжээчийн дүгнэлт гарна, мөрдөн шалгах ажиллагаа явагдана, буруутай этгээдийг шалгаж тогтооно  гэж найдаж байна.

Хэрэг шалгагдаж байгаа учраас хэргийн материалтай холбоотой мэдээллийг задруулах боломжгүй” гэлээ.