Мэргэжлийн сүмогийн Нагоя башёгийн 11 дэх өдрийн барилдаанууд өчигдөр/2024.07.24/ боллоо. Башёг ганцаараа итгэл төгс, ялагдаагүй тэргүүлж байсан ёкозүна Тэрүнофүжи Г.Ган-Эрдэнэ башёгийн анхны ялагдлаа амсчээ.

Сүмогийн залуу од сэкивакэ Оносато башёгийн 11 дэх өдөр ёкозүна Тэрүнофүжиг өвдөг шороодуулж, башёг сонирхолтой болгов. Өдгөө 24 настай, Нацү башёгийн аварга тэрбээр ийнхүү зургаан даваа, таван унаатай боллоо.

Дийлдэшгүй байсан аваргыг дийлсэн Оносато "Барилдаан эхлэх үед би бараг л ялагдсан. Гэхдээ дотроо ‘Хөдөл, хөдөл’ гэж бодсоор сайн үр дүн авч чадлаа. Энэ башёгийн өрсөлдөөн ширүүн байна. Гэхдээ дуусах болоогүй" гэв.

11 даваа, нэг унаатай яваа Тэрүнофүжигийн амжилттай дөхөх бөх алга. Түүнтэй хамгийн ойр яваа нь найман даваа, гурван унаатай озэки Хошорюү С.Бямбасүрэн, озэки Котозакүра, Таканошо, Чүраноүми, Вакатакакагэ нар байна.

Угтаа озэки Котозакүра яг араас нь нэхэж байсан ч өчигдөр Киришима Б.Лхагвасүрэнд унаж, найман даваа, гурван унаатай болжээ.

Киришима Б.Лхагвасүрэн озэки цолоо эргүүлэн авахыг хүсч байвал үлдсэн дөрвөн өдрийн барилдаан давж, арван даваатай болох хэрэгтэй.