Сүхбаатарын талбайд “Оюутолгой” компанийн ажилчид хөдөлмөрлөх эрх зөрчигдөж байгааг эсэргүүцэн, өнөөдөр /2024.07.25/ тайван жагсаал зохион байгууллаа.

Тус компани нь 4000 орчим үндсэн ажилтантай бөгөөд 14 хоног ажиллаад 14 хоног амардаг аж. “Оюутолгой” компанийн гүйцэтгэх захирал 2021 оны арванхоёрдугаар сарын 31-нд тушаал гаргаснаар 168 цаг ажиллавал илүү цагийн хөлс тооцдог, 168 цагаас дотогш ажиллавал 14 хоног амарч байгаа нь нөхөж амраасанд тооцно гэж үзэн, илүү цагаар ажилласны хөдөлмөрийн хөлсийг тооцдоггүй болжээ. Үүнээс болж, тус компанийн ажилчдын цалин буурсан байна.

Өнгөрсөн хугацаанд тус компанийн ажилчид дээрх тушаалыг өөрчлөхийг хүсч олон удаагийн шаардлага тавьсан ч хүлээн авалгүй өнөөдрийг хүргэжээ. Иймээс ажил олгогч нарыг хамтын хэлэлцээрт орж тавьж буй асуудлыг эргэн харж нааштай шийдвэр гаргахыг хүсч, өнөөдөр ийнхүү тайван жагсаал зохион байгуулж байна гэдгийг компанийн ажилчдын төлөөлөл мэдэгдлээ.

Илүү цагийн хөлс тооцохгүй байгаа гомдлыг “Оюутолгой” компанийн ажилчид хуулийн холбогдох байгууллагад өгснөөр 2024 оны тавдугаар сарын 28-нд Улсын дээд шүүхээс “Хуульд нийцээгүй тушаал гаргасан байна. Илүү цагийн асуудлыг хамтын хэлэлцээрээр зохицуулна” гэдэг тайлбар гаргасан аж. Гэвч өнөөдрийг хүртэл арга хэмжээ аваагүй.

Мөн өнгөрсөн тавдугаар сарын 8-нд компанийн ажилчид ажил хаялт зарласан. Гэтэл компаниас ажилчдыг ажил хаялтад оролцсон гэдэг үндэслэлээр мэдүүлэг авах, туршилтын хугацаанд ажил хаялтад оролцсон гэдэг шалтгаанаар шинээр ажилд орох гэж байсан хүнийг ахлах ажилтных нь дүгнэлтээр бус менежерийн дүгнэлтээр ажилд авахгүй байх шийдвэр гаргасан зэрэг зөрчил ч гарсан аж. “Оюутолгой” компанийн ажилчдын эрх ашгийг хамгаалах Үйлдвэрчний эвлэл энэ асуудлаар Хүний эрхийн үндэсний комисст мөн хандсан байна.

Тус компанийн нийт ажилчдын 94 хувийг монгол ажилчид эзэлдэг бол зургаан хувийг гадаадын ажиллах хүчин бүрдүүлдэг байна. Харин нэг л гадаад ажилчны авч буй цалин 20-25 монгол ажилчны авдаг цалинтай тэнцдэг гэдгийг тэд хэллээ.