Монголчуудын хувьд Парисын олимп өнөөдөр/2024.07.25/ эхэлж байна. Тодруулбал, байт харвааны чансаа тогтоох харваа өнөөдөр 20:15 цагаас эхлэх бөгөөд тус харваанд Б.Отгонболд өрсөлдөх юм. Нийт 64 шилдэг харваач чансаа тогтоох харвааны дүнгээрээ эрэмблэгдэж, хоёр, хоёроороо өрсөлдөх журамтай. Үндсэн харваа долдугаар сарын 30-ны өдрийн 12:00 цагт эхэлнэ.

Ханжоугийн Азийн наадмын аварга Б.Отгонболд нь Токиогийн олимпод өрсөлдөж байсан туршлагатай нэгэн. Тухайн үед тэрбээр дэлхийн чансааны 147 дугаарт бичигдэж байв. Харин одоогийн байдлаар 50 дугаар байрт жагсч байна. Дэлхийг чансааг Бразилын Маркус Д’Алмейда тэргүүлж, Өмнөд Солонгосын Ким Вүжин, И Вү Сок, Туркийн Мете Газоз, Италийн Мауро Несполи нар удаалж байна.

Азийн наадамд Б.Отгонболд чансаа тогтоох харваанд 662 оноо авч, 20 дугаар байр эзэлсэн. Уг амжилтаараа дөрөвдүгээр хэсэгт хуваарилагдаж эхлээд Ливаны Эль Райесыг, дараа нь Японы алдарт тамирчин, олимпийн хоёр хүрэл, нэг мөнгөн медальт Такахарү Фүрүкаваг болон Тайванийн Тан Чи-Чуныг тус, тус ялж хэсгийн аваргын төлөө шалгарсан. Хэсгийн аваргын харваандаа Индонезийн Риав Салсабиллаг, хагас шигшээд Казахстаны Илфат Абдуллиныг ялснаар финалд Хятадын Жи Шианшуотой учраа таарч, 3-1 гэсэн харьцаатай ялсан түүхтэй.