АНУ-ын дэд ерөнхийлөгч Камала Харрис 2024 оны ерөнхийлөгчийн сонгуульд өрсөлдөх болсон. Гэхдээ түүний харьяалагддаг Ардчилсан намаас хэд хэдэн хүчтэй өрсөлдөгч гарч ирсэн тул Камала намынхаа Үндэсний их хурлын төлөөлөгчдөөс дэмжлэг авч байна. Ингэснээр тэрбээр намаа төлөөлж Дональд Трамптай өрсөлдөх боломж, бололцоог бүрдүүлж байна.

Харрис энэ долоо хоногийн Даваа гаригт Делавэр мужийн Уилмингтон хотод очиж, кампанит ажлаа эхлүүлэв. Тэрбээр дэмжигчдэдээ хандаж Байдены засаг захиргааны ололт амжилтыг хамгаалж, бүх төрлийн гэмт хэрэгтнүүдийг хууль дүрмийн дагуу шийтгэнэ гэдгээ онцоллоо.

Ингэхдээ Трампыг дурдан "Эмэгтэйчүүдийг хүчирхийлдэг, ард иргэдийг луйварддаг, ашиг сонирхлоо хадгалахын тулд дүрмийг зөрчдөг хүмүүсийг би мэднэ. Би Дональд Трампын төрлийн хүмүүсийг мэднэ" гэжээ.

Ардчилсан намын Үндэсний хороо наймдугаар сарын 19-нд намын их чуулга уулзалтаа зохион байгуулна. Үүнээс хоёр долоо хоногийн өмнө буюу 7-ний өдөр ерөнхийлөгчийн сонгуульд оролцох нэр дэвшигчээ цахим санал асуулгаар тодруулах болжээ.

Харрис сонгуульд нэр дэвшинэ гэх мэдээлэл гарсны дараа 24 цагийн дотор түүнийг дэмжигчид нийт 81 сая ам.доллар хандивласан байна.

Энэ нь АНУ-ын түүхэнд байгаагүй богино хугацаанд их мөнгө цугларсан явдал гэж Харрисын кампанит баг мэдэгдэв. Үүнээс гадна ерөнхийлөгч Жо Байден сонгуульд өрсөлдөж байсан хугацаандаа 100 сая ам.долларын хандив цуглуулж чадсан байдаг бөгөөд энэ мөнгө нь Харрисын кампанит ажилд зориулагдах хандлагатай байна. Гэсэн хэдий ч сөрөг хүчин болох Бүгд найрамдах намын гишүүд, сонгуулийн ажлыг санхүүжүүлдэг хэд хэдэн хуульчид хамтран Холбооны сонгуулийн хороонд гомдол гаргаж, Байдены цугларсан хандивыг Харрист шилжүүлэхийг эсэргүүцнэ гэж мэдэгджээ.

Эх сурвалж: BBC