Долдугаар сар хур тунадас ихтэй байсан учир гол усны түвшин ерөнхийдөө их байгаа. Тэгвэл өнгөрсөн амралтын өдрүүдэд үргэлжлэн орсон борооны улмаас ихэнх голын усны түвшин нэмэгдэж үерийн аюултай түвшинд хүрэх эрсдэл үүссэнийг албаныхан хэлэв.

Өнөөдөр /2024.07.24/ Хэнтий аймгийн нутаг, Төв аймгийн зүүн хэсэг болон Дорноговь аймгийн хойд хэсгээр ахиухан хэмжээний аадар бороо орох төлөвтэй байгааг Ус цаг уур, орчны шинжилгээний газраас мэдээлсэн. Ингэснээр Хэрлэн гол, Багануур дүүрэг орчимд усны түвшин одоо байгаа хэмжээнээсээ 10 см-ээр даван үерлэх эрсдэл үүсэж нөхцөл байдал хүндрэх төлөвтэй байгааг Онцгой байдлын ерөнхий газраас мэдээлэв. Тиймээс иргэд болон холбогдох мэргэжлийн байгууллагуудыг Ус, цаг уурын байгууллагаас өдөр бүр гаргаж буй мэдээлэл, сэрэмжлүүлгийг цаг алдахгүй авч,онцгой анхаарч байхыг сануулав. Мөн голын ай сав дагуу амарч зугаалахгүй, бага насны хүүхдэд тавих хараа хяналтаа сайжруулж үер, усны аюулаас сэрэмжтэй байхыг анхаарууллаа.

Долдугаар сарын 23-ны өдрийн байдлаар Хөвсгөлийн уулсаас эхтэй Эг, Бэлтэс, Шишхэд, Туул, Ерөө зүүн хажуугийн Эг, Хурх, Барх, Онон, Хэрлэн, Хангай нурууны арын Орхон гол Сэлэнгэ мөрний дагууд усны түвшин өмнөх өдрийнхөөс 10-85 см нэмэгдэж, Туул /Босгийн гүүр-Улаанбаатар–Лүн-Заамар/, Хэрлэн /Мөнгөнморьт-Өндөрхаан-Чойбалсан/ гол үерийн түвшинг 10-40 см давсан байдалтай байна. Харин Үүр голын усны түвшин аюултай түвшнээс буусан хэдий ч үерийн түвшинг 105 см давсан байдалтай байгаа ажээ. Долдугаар сарын 21-ний өдрийн борооны улмаас Тэрэлж , Туул голын эхээр усны түвшин 70-120 см огцом нэмэгдсэн ба Туулын үерийн шилжилт долдугаар сарын 23-ны өдрийн байдлаар Улаанбаатар хотод  65 см нэмэгдэж , үерийн аюултай түвшинд дөхөн үерлэжээ. Цаашид ч түвшин нэмэгдэх хандлагатай байгааг албаныхан хэлж байна.