Улсын наадамд дөрөв давсан бөхчүүд, манлайлсан сурын харваачдын допингийн шинжилгээний хариу бүрэн ирсэн. Нийт 48 сорьцын дөрвөөс нь допингийн төрлийн хориотой бодис илэрсэн нь тогтоогдож, хариутайгаа танилцжээ. Дараах тамирчдын сорьцоос WADA буюу Дэлхийн допингийн эсрэг агентлагийн хориотой эмийн жагсаалтад багтсан бодисууд илэрсэн аж.

• Ховд аймгийн Булган сумын харьяат улсын харцага Г.Ганхуяг
• Өмнөговь аймгийн Ноён сумын харьяат аймгийн хурц арслан М.Буяндэлгэр
• Ховд аймгийн Алтай сумын харьяат аймгийн арслан Г.Хишигбат
• Баянхонгор аймгийн Хүрээмарал сумын харьяат Цэргийн арслан Г.Жамбалдорж

М.Буяндэлгэр, Г.Хишигбат, Г.Жамбалдорж гурвын тухайд дөрөв давж, тавын даваанд өвдөг шороодсон билээ. Баяр наадмын шинэчилсэн хуулиар дөрөв давсан бөхчүүдийг допингийн шинжилгээнд хамруулдаг болсон. Магадгүй допингийн төрлийн хориотой бодис хэрэглэсэн бөх дөрөв давж, тавын даваанд унахыг үгүйсгэхгүй учир хуульд ийн өөрчлөлт оруулжээ. Нөгөө талаараа допингийн төрлийн хориотой бодис хэрэглэсэн ч дөрвийн даваанд өвдөг шороодсон гэдэг утгаараа шинжилгээнээс зайлсхийж, тавын даваанд унасан бөхөөс нь допинг илэрвэл хуулийн цоорхойг ашиглан допингтой ч цол нэмэх эрсдэл үүсэх юм.

Харин улсын харцага Г.Ганхуяг энэ жилийн наадмаар зургаа давж, цолоо баталсан. Харамсалтай нь шинжилгээнд бүдрэв. Ингэснээр дараах тав, зургаагийн даваанд түүнд өвдөг шороодсон дараах бөхчүүд цол нэмэх учиртай.

• Тавын даваанд унасан Хэнтий аймгийн Дэлгэрхаан сумын харьяат аймгийн арслан Д.Аззаяа улсын начин цол
• Зургаагийн даваанд унасан Өвөрхангай аймгийн Баян-Өндөр сумын харьяат улсын начин Т.Довчинсэмбээ улсын харцага цол.

Удахгүй баяр наадмын зохион байгуулах хорооны бөхийн салбар хороо хуралдаж, үр дүнгийн удирдлага хийн дээрх бөхчүүдэд ямар шийтгэл оноох талаар хэлэлцэж, бөхчүүдийн цол чимгийг хураах, нөхөн олгох саналыг Ерөнхийлөгчийн тамгын газарт хүргүүлэх дүрэмтэй. Хэрэв бөхчүүд шинжилгээний хариутайгаа санал нийлэхгүй байвал В сорьцоо шинжлүүлэх эрхтэй.

Гэм буруугаа хүлээн зөвшөөрсөн, хамтран ажилласан, сорьцоос илэрсэн хориотой бодисын хэмжээ зэргээс шалтгаалан барилдах эрхийг хасах учиртай.