Улсын хэмжээнд 13 аймгийн 75 сум, Улаанбаатар хотын ногоон бүс, Богдхан-Уулын Дархан цаазат газар, Горхи Тэрэлжийн байгалийн цогцолборт газарт ойн сангийн нийт 341.0 мян.га талбайг хамруулан ойн хөнөөлт шавжийг устгах ажил хийж байна.

Ойн хөнөөлт шавжийн голомтыг устгах ажлыг микробиологийн бэлдмэлээр агаарын хөлөг, шүршигч багаж, өндөг хусаж цуглуулах механик арга, гэрлэн урхи тавих аргуудыг ашиглан хийж буй.

Агаарын хөлөг ашиглан ойн хөнөөлт шавжийг устгах ажлыг 100.0 мян.га талбайд хийж гүйцэтгэхээр төлөвлөснөөс одоогоор 80.3 мян.га талбайд энэхүү ажлыг гүйцэтгэжээ. Шүршигч багаж ашиглан хортон шавжийг устгах ажлыг 223.0 мян.га талбайд гүйцэтгэхээс 148.5 мян.га талбайд хийжээ.

Ойн хөнөөлт шавжтай тэмцэх ажлыг улсын төсвийн хөрөнгөөр хийж байгаа бөгөөд нийтдээ 70 орчим хувьтай үргэлжилж байна.

Гэрлэн урхи тавих, өндөг хусаж цуглуулах механик аргаар тэмцэх ажлыг долдугаар сарын 25-аас эхлүүлэхээр болжээ. Уг ажилд тусгай зөвшөөрөл бүхий 27 аж ахуйн нэгжийн инженер, техникийн 180 ажилтан, улирлын чанартай ажилладаг болон туслах 300 ажилтан, нийт 500 гаруй хүн оролцож байна.