Парис хотын цагдаа болон хууль хүчний байгууллагын ажилчид өндөржүүлсэн бэлэн байдалтай ажиллаж байна. Олимпийн нээлт Сена мөрний эрэг дагуу болох бөгөөд үүнтэй холбогдуулан 10 мянган тамирчин, 300 мянган үзэгч, албаны хүмүүсийн аюулгүй байдлыг хангахаар эргийн зургаан км орчим нутагт хамгаалалтын бүс тогтоож, явган зорчигч нэвтрүүлэхгүй байгаа аж.

Олимпийн наадамд өрсөлдөж буй тамирчин-эцэг, эхүүд тамирчдын тосгонд хүүхэдтэйгээ цагийг өнгөрүүлэх боломжтой болжээ. Тамирчдын тосгон дотор хүүхдүүдтэйгээ цагийг өнгөрүүлэх боломжтой хэсэг нээгдсэн бөгөөд тамирчид энд хүүхдийнхээ живхийг солих, хөхүүлэх, тоглох гээд бүхий л боломжийг нь хангажээ. Амаржаад удаагүй байгаа олимпийн аварга, Францын нэрт жүдоч Кларисс Агбеньену улсынхаа ерөнхийлөгч Эммануэль Макроноос тусгайлан хүссэний эцэст олимпийн түүхэнд анх удаагаа тамирчдын тосгонд хүүхдийн өрөө нээжээ. Гэхдээ хүүхэд асрах, харах үйлчилгээ байхгүй аж.

Палестины олимпийн хорооны зүгээс Парисын олимпод Израилийн тамирчдыг оролцуулахгүй байхыг хүсчээ. Газын зурваст өрнөж буй зэвсэгт мөргөлдөөний улмаас энэ бүхэн улбаатай. Палистины олимпийн хорооны ерөнхийлөгч Жаюүси "Бид Израилийн тамирчдыг олимпод оролцуулахгүй байх хүсэлтийг хүргүүлсэн. Учир нь бид ийм ёс зүй олимпийн үзэл санаанд нийцэхгүй гэж үзэж байгаа. Хүмүүсийг алж, тамлаж байгаагаараа бахархдаг Израилийн тамирчдыг олимпод оролцуулж байгаадаа Олон улсын олимпийн хороо санаа зовох хэрэгтэй" гэв. Газад Палестины 400 гаруй тамирчин, дасгалжуулагч амиа алдсан гэнэ.

Олимпийн 8.8 сая тасалбар борлуулагдаж, хоёр мянга гаруй тамирчид Парист ирээд байна. Олон улсын олимпийн хорооны ерөнхийлөгч Томас Бах "Бэлтгэл ажил сайн хангагджээ. Аливаа ажлыг, сорилтыг үл зүрхшээн гүйцэтгэдэг гайхалтай зохион байгуулах хороо бидэнд байна" гэжээ.

Сена мөрнийг цэвэр хэвээр нь авч үлдэнэ гэж зохион байгуулагчид найдаж байна. Парис хотоор урсах Сена мөрнийг олимпийн наадамтай холбогдуулан цэвэрлэж, хог хаягдлаас нь салгасан. Тус мөрөнд триатлоны тэмцээн болох бөгөөд олимп дууссан ч цэвэр хэвээр нь хадгалж үлдэнэ гэж найдаж байгаа аж. Сена мөрнийг цэвэрлэх, дэд бүтцийг сайжруулах, шинэчлэх ажилд 1.5 тэрбум ам.доллар зарцуулжээ.