Нийслэлийн хэмжээнд дөрөвдүгээр сараас хойш авто зам засварын ажил хийгдэж буй. Тэгвэл өнөөдрийн байдлаар/2024.07.24/ нийт 14 байршилд авто зам шинэчлэлтийн ажил хийж дуусчээ. Авто замыг шинэчлэн засах ажил ирэх арваннэгдүгээр сар дуустал үргэлжилнэ гэдгийг Нийслэлийн Замын хөгжлийн газраас мэдээлэв.  III, IV хорооллын авто зам буюу Өргөө кино театраас зүүн тийш, Ахуй үйлчилгээ хүртэлх авто замыг өнгөрсөн Даваа гаригийн өглөө ашиглалтад хүлээлгэж өгөх байсан боловч хоёр өдөр үргэлжлэн орсон борооны улмаас замын шинэчлэлийн ажил түр хойшилсон. Тодруулбал дээрх замын арын хэсгийн засвар шинэчлэлийн ажил үргэлжилж байгаа гэв. Мөн тус газраас мэдээлснээр, бороо их орсон ч засварлаж шинэчилсэн зам эвдэрч гэмтэх асуудал гараагүй, цаашид ч гарахгүй гэлээ. Энэ жилийн хувьд Улсын баяр наадмын өмнө 17 байршилд авто замын шинэчлэл хийх байснаас 14 байршилд засвар, шинэчлэлийн ажил хийж дууссан байна.

Авто зам шинэчлэлийн ажилд Нийслэлийн замын сангийн хөрөнгөөс 37 тэрбум төгрөг зарцуулна.

Намъяанжүгийн гудамж, Амгалангийн зам, УБЦТС-ийн баруун талын зам, Богд уулын арын зам, Зайсангийн уулзвараас Буган халиун хүртэлх зам, Соёолжоос Нарны замын уулзвар хүртэлх зам, Төмөр замаас хойш Энхтайвны өргөн чөлөө хүртэлх зам, Хилчний гудамж буюу Цагдаагийн академийн хойд зам, СУИС-ийн уулзварын зүүн талын зам, Нарантуул захаас Өгөөмөр захын уулзвар хүртэлх зам, Чингэлтэй дүүргийн дөрөвдүгээр хороо буюу тавдугаар сургуулийн уулзвараас Их сургуулийн гудамж хүртэлх авто замыг тус тус шинэчилжээ.

Үргэлжүүлэн арваннэгдүгээр сар хүртэл 29 байршилд авто замын шинэчлэлийн ажил хийхээр төлөвлөжээ.