Зуны бүгчим халуун өдрүүдэд нийслэлчүүд голын эрэг дагуу амарч зугаалдаг. Гэсэн хэдий ч ойрын өдрүүдэд бороо үргэлжлэн орж, голын ус эргээ давж, үерлэсэн дүр зурагтай байна. Тиймээс онцгойгийн алба хаагчид гол руу ойртохгүй байхыг анхааруулсан самбар байршуулан замыг нь хаажээ. Биднийг Баянзүрхийн гүүр дагуух Туул гол дээр очиход цөөнгүй иргэд овоолсон шороон хаалтыг машинтайгаа давж, голын эрэг дагуу амарч зугаалж байлаа. Зарим нь бага насны хүүхдээ голын үертэй усанд хөтөлж яваа харагдав.

Тэдний дэргэд онцгой байдлын завь эргүүл ажиллаж, анхааруулга зөвлөмж өгсөн ч үл тоосон хандлага гаргах аж.

"ХҮМҮҮС НАМАЙГ ХАРААД "ЯМАР ХӨӨРХӨН ЮМ БЭ" ГЭЖ ӨХӨӨРДӨН БАС ИХ ГАЙХДАГ"

Онцгой байдлын 5-6 алба хаагчтай завьт эргүүлийн хоёр бүлэг Гачууртын Хар-Усан тохойноос Нисэхийн Хадан хясаа хүртэл өдөр бүр ажилладаг. Алба хаагчид дунд нэгэн бяцхан аврагч ажиллаж байсан нь анхаарал татсан юм. Түүнийг У.Нарантэнгэр гэдэг. Тэрбээр "Эрдэм-Оргил" цогцолборын долдугаар ангийн сурагч. Зуны амралтаараа хоёр дахь жилдээ сайн дураараа завьт эргүүлийн багт ажиллаж байгаа аж.

Бяцхан аврагч хүү ах нартаа тусалж, гол дагуу амарч зугаалж яваа иргэдэд сэрэмжлүүлэг зөвлөмж өгнө.

Түүний зөвлөмжийг сонссон иргэд "Ямар хөөрхөн юм бэ" гэж өхөөрдөн бас их гайхдаг гэнэ. Тэрбээр "Би ирээдүйд иргэдийн амь насыг авардаг гал сөнөөгч болохыг хүсдэг. Тэр ч утгаараа гэр бүлийнхнээсээ зөвшөөрөл авч, онцгой байдлын албанд сайн дураараа ажиллаж байна. Ах нартайгаа явж байхад бага насны хүүхдүүд тоглоомоо усанд урсгаж, усанд хөл алдах тохиолдол их гардаг. Бас янз бүрийн амьтны дүрстэй хийлдэг гудастай усанд хөвөх нь маш аюултай. Томчуудыг ийм тоглоом битгий авч өгөөчээ гэж анхааруулаад байхад тоодоггүй. Тиймээс онцгойгийн алба хаагчдын зөвлөмжийг анхаарахыг аминчлан захиж байна" гэсэн юм.

Нийслэлийн Онцгой байдлын газар өнгөрсөн жилээс иргэдийн амь насыг хамгаалж, урьдчилан сэргийлэх үүднээс Хар-Усан тохой, Баянзүрхийн гүүр, Сонсголон гүүр зэрэг эрсдэл өндөртэй таван байршилд камер байршуулжээ. Эдгээр камерыг нийслэлийн Онцгой байдлын газрын Дэд төвөөс 24 цагаар дэлгэцээр хянадаг байна. Голын ус үерлэсэн, ард иргэдэд эрсдэлтэй нөхцөл байдал ажиглагдвал завьт эргүүл рүү мэдэгдэж, иргэдийг авран хамгаалдаг байна.

Эдгээр таван камер нь 360 градус эргэж, голын ойр орчмыг харуулдаг бөгөөд энэ жил Нийслэлийн Иргэдийн төлөөлөгчдийн хуралдаанаас баталсан санхүүжилтээр шинээр дуут анхааруулга өгдөг найман камер нэмж байршуулахаар төлөвлөжээ.

Уг дэвшилтэт технологийг ашигласнаар онцгойгийн алба хаагчдын ажлын ачааллыг хөнгөлж, гол дагуу амарч зугаалж яваа иргэдийн амь насыг авран хамгаалахад ач холбогдолтой гэдгийг албаныхан онцолсон юм. Гол дагуу хэдэн зуун хүнд тэр бүр завьт эргүүл хүрч ажиллаж чадахгүй учраас орчин үеийн дэвшилтэт технологи ашигласнаар алба хаагчид богино хугацаанд шуурхай арга хэмжээг авч чадах юм. Энэ камер нь цагдаагийн байгууллагын ажилд ч багагүй тус нэмэртэй байдаг аж.

Зарим иргэд онцгойгийн алба хаагчдын өөдөөс хэрэлдэх, маргах тохиолдол гардаг байна. Тиймээс нэг цагдаатай хамт явж, зөвлөмж өгч, шаардлага тавьдаг гэдгийг учирлаж байв.

ЗАВЬТ ЭРГҮҮЛЭЭР АЖИЛЛАХДАА ӨДӨРТ 400-500 ХҮН СЭРЭМЖҮҮЛЭГ ӨГЧ, ЗӨВЛӨДӨГ

Аврах ангийн бүлгийн дарга, аврах ажиллагааны зааварлагч Г.Гансүх:

-Нийслэлийн Онцгой байдлын газрын Аврах анги, нийслэлийн Цагдаагийн газар, Хүүхэд хөгжлийн төв хамтран 2024 оны зургадугаар сарын 10-наас есдүгээр сарын 10-н хүртэл завьт эргүүлээр ажиллаж байна. Аврах ангийн хувьд Гачууртын Хар-Усан тохойноос Нисэхийн Хадан хясаа хүртэл хоёр бүлэг өдөр бүр ажилладаг. Завьт эргүүлээр явж байх хугацаанд иргэд голын усанд зориулалтын бус хөвдөг хэрэгсэл, хийлдэг гудсан дээр хүүхдүүдээ их тоглуулж байна. Мөн бага насны хүүхдэдээ анхаарал бага тавьж, архи согтууруулах ундаа уухаас гадна баталгаагүй гарцаар ус гатлах гэж байгаад өөрсдийнхөө амь насыг эрсдэлд оруулж байна. Тиймээс ард иргэд та бүхэн гол дагуу амарч зугаалахдаа анхаарал болгоомжтой байхыг ахин дахин зөвлөе.

Завьт эргүүлээр ажиллахдаа өдөрт 400-500 хүн сэрэмжүүлэг өгч, зөвлөж байна.

Сүүлийн үед усанд осолдсон гэх дуудлага мэдээлэл буурахгүй, улам нэмэгдэж байна. Харамсалтай тохиолдол олон гарч байна. Сүүлд баяр наадмын өдөр буюу долдугаар сарын 11-нд Баянзүрхийн гүүрэн доор 16-18 насны дөрвөн хүүхэд усанд тоглож байгаад нэг нь усанд живсэн. Завьт эргүүлийн баг ойрхон байсан учраас аварч, анхны тусламж үзүүлж эмнэлэгт хүлээлгэн өгсөн. Ер нь огт сэлж чаддаггүй хүмүүс усанд ойртдоггүй. Усан сан, бассейнд сэлдэг хүмүүс болон согтууруулах ундаа хэрэглэсэн иргэд голд сэлж, шөрмөс нь татах тохиолдол их байна.

ААВ, ЭЭЖТЭЙГЭЭ ЗУГААЛЖ ЯВСАН 3 ХҮҮХЭД УСАНД ЖИВЖ, ХОЁРЫГ НЬ АВАРЧЭЭ

Онцгой байдлын албанд долдугаар сарын 22-нд нэг гэр бүлийн таван хүүхэд эцэг эхтэйгээ гол дагуу амарч, зугаалж явжээ. Бага насны гурван хүүхэд нь усанд хөл алдаж, живж байхад нь дэргэдүүр нь өнгөрч байсан иргэн олж харж, хоёрыг нь аварсан байна. Харин зургаан настай хүүхдийг нь аварч чадаагүй.

Онцгой байдлын газрын Аврах ангийн хоёр бүлэг долдугаар сарын 22-ний 16.00-22.00 цаг хүртэл эрэн хайх ажиллагааг зохион байгуулсан.

Үргэлжлүүлэн долдугаар сарын 23-ны 06.00 цагаас эрлийн ажлыг эхлүүлэх явцад УБТЗ байгууллагын ажилчид мэдээлэл өгч, усанд живсэн хүүхдийн цогцсыг олсон. Онцгойгийн алба хаагчид цогцсыг цагдаагийн байгууллагад хүлээлгэн өгчээ.

"ГОЛ РУУ ЯВАХ ЗАМЫГ НЬ ХААХААР ИРГЭД МАШИНТАЙГАА ДАВААД ОРЧИХДОГ"

НОБГ-ын Гамшгаас урьдчилан сэргийлэх хэлтсийн дарга Д.Хадбаатар:

-Улаанбаатар хотод долдугаар сарын 21-ний өдрөөс үргэлжлэн орсон борооны улмаас Тэрэлж голын усны түвшин 120 см, Туул гол 60 см-ээр нэмэгдэж, үерийн аюултай түвшинг даваад байна. Онцгой байдлын албанаас Баянзүрхийн гүүрний хэсэгт анхааруулах самбар байршуулсан хэдий ч тэр самбар нь усанд автаж, гол үерлэсэн байдалтай байна. Гол мөрний усны түвшин нэмэгдсэн тул иргэд аюулгүй байдлаа хангаж, аль болох үерлэсэн гол дагуу амарч зугаалахгүй байхыг зөвлөе. Учир нь голын усны түвшин үерийн аюултай түвшинд хүрч, шороон замыг нь хаасан байхад иргэд машинтайгаа давж орж байна. Энэ бүхэн эрсдэл дагуулж байгаа юм. Таны өмнө нь ирсэн түвшнээс гол мөрөн нэмж үерлэсэн учраас онцгойлон анхааруулъя.

Мөн нийслэлийн Онцгой байдлын газраас завьт эргүүлүүд 08.00-21.00 цаг хүртэл гол дагуу байнга ажиллаж байна.

Эргүүл ажиллах явцад долдугаар сарын 22-ны өдөр Улиастайн гүүрний ойролцоо хоёр иргэн согтууруулах ундааны зүйл хэтрүүлэн хэрэглэсэн үедээ гол гатлах гэж байгаад живсэн. Энэ үеэр завьт эргүүлүүд ойр ажиллаж байсан учраас хоёр хүнийг аварч чадсан. Тиймээс иргэд та бүхэн мэргэжлийн байгууллагын зөвлөмжийг зөвөөр хүлээн авч, анхаарах шаардлагатай. Нийслэлийн хэмжээнд энэ оны долоон сарын байдлаар 11 хүн усанд живж, харамсалтайгаар нас барсан. Үүний долоо нь том хүн, гурав нь бага насны хүүхэд байсан.

ГЭРЭЛ ЗУРГИЙГ Б.БАТЦАГААН