Улсын баяр наадамд дөрөв давсан бөхчүүд, манлайлсан сур харваачид гээд нийт 48 хүнээс допингийн сорьц цуглуулсан. Тус сорьцнуудыг Герман улсын Дрезден хотын лабораторид шинжлүүлэв. Эхний ээлжинд 44 сорьцын хариу ирсэн бөгөөд дараагийн ээлжинд гурван сорьцын хариу ирж, нэг сорьцын хариу үлджээ. Дөрвөн сорьцыг нарийвчилсан шинжилгээнд оруулах шаардлагатай байсан аж.

Тэгвэл ирсэн гурван сорьцоос допингийн төрлийн хориотой эм бэлдмэл илэрсэн нь нотлогдож, бөхчүүд хариутайгаа танилцжээ. Хэвлэлүүдийн мэдээлж буйгаар улсын харцага Г.Ганхуяг, аймгийн арслан Г.Хишигбат, цэргийн арслан Г.Жамбалдорж нар хариутайгаа танилцсан гэнэ. Гэхдээ бөхийн салбар хороо, Монголын үндэсний допингийн эсрэг байгууллага, үндэсний бөхийн холбооноос албан ёсны мэдээлэл хийгээгүй.

Харин цэргийн арслан Г.Жамбалдорж өөрийн цахим хуудсаараа дамжуулан допингийн шинжилгээнд бүдэрсэн гэдгээ мэдэгдэж, ард түмнээсээ уучлалт гуйв. Тэрбээр "Та бүхэндээ энэ өдрийн мэндийг хүргэе! Энэ мэдэгдлийг хийхийнхээ өмнө миний бие Монголынхоо ард түмэн, үндэсний бөхөд хайртай хүмүүс, нийт бөхчүүдээсээ чин сэтгэлээсээ уучлалт хүсэж байна.

Ардын хувьсгалын 103 жилийн ойн үндэсний бөхийн барилдаанд дөрөв давж, баяр наадмын хуулийн дагуу допингийн шинжилгээнд хамрагдсан.Хариугаа өчигдөр Үндэсний их баяр наадмын зохион байгуулах хорооны Үндэсний бөхийн салбар хорооноос байгуулагдсан Үр дүнгийн удирдлагын багаас авч, өөрийн биеэр танилцлаа.

Би “В” сорьцын шинжилгээгээ өгөхгүй гэдгээ мэдэгдсэн учраас өөрөө хариугаа зарлаж байна.

Миний шинжилгээний хариу эерэг гарч, допингийн төрлийн бодис гарсан гэж зохион байгуулах хорооноос танилцуулж бичгээр өглөө.Миний хувьд санаатайгаар допингийн төрлийн хориотой бодис хэрэглэсэн зүйл байхгүй. 2014 оноос хүзүүндээ хүнд бэртэл авч, байнга эмчилгээ хийлгэж байсан. Надад зорилго, бөхийн карьер бий. Намайг дэмждэг хүмүүс, ар гэр, үр хүүхдүүд минь байнга дэмжиж байсан учир зорилгынхоо төлөө, шүд зуун тэмцсээр ирсэн. Байнгын эмчилгээ хийлгээд явдаг байсан. Өнгөрсөн зунаас бэртэл маань сэдэрч, өнгөрсөн улирлын барилдаанд олон гарч чадаагүй. Эмчилгээндээ хэрэглэсэн эм, тарианы найрлагад нөгөө хориотой 400 гаруй төрлийн эмийн бодисоос байжээ. Би анзаарах ёстой байсан.

Залуус, дүү нартаа бэртэл гэмтэл авбал, цаг алдалгүй бүрэн гүйцэд эмчлүүлж, болсон үедээ спортдоо ирэхийг захиж хэлмээр байна.Мөн үеийн залуусыг мэдлэг мэдээллээ дээшлүүлж, эмч болон мэргэжлийн байгууллагуудтай уялдаа холбоотой байж, эмчлүүлэх нь чухал юм байна. Эрүүл мэндээ хайрлаарай. Спорт бол эрүүл залуу насны богинохон л баясгаад өнгөрөх хором мөч.

Миний хувьд олон улсын итгэмжлэгдсэн лабораторийн хариуг үгүйсгэхгүй. Мэдлэг мэдээлэл дутуу, хариуцлагагүй алдаа гаргасан тул, гаргасан алдаагаа хүлээн зөвшөөрч, шударга бус өрсөлдөөн бий болгох, санаа зорилго байгаагүй гэдгээ албан ёсоор хэлж, Баяр наадам зохион байгуулах комиссын оногдуулах шийтгэлийг хүлээн авахад бэлэн байгаагаа мэдэгдэж байна.Монголынхоо ард түмэн, үндэснийхээ өв соёлд хайртай хүмүүс, дэмжиж тусалж байсан бүх хүмүүс, бөхчүүдээсээ чин сэтгэлээсээ дахин уучлалт хүсэж байна" гэлээ.