Мэргэжлийн сүмогийн Нагоя башё эхлээд есөн өдрийг үджээ. Өчигдрийн байдлаар/2024.07.22/ ёкозүна Тэрүнофүжи Г.Ган-Эрдэнэ есөн даваатай, нэг ч унаагүй башёг итгэл төгс ганцаараа тэргүүлж байна. Өдгөө 32 настай түүний хувьд өвдөг, хавирганы бэртлийн улмаас Харү болон Нацү башёд бүрэн барилдаж чадалгүй орхисон билээ. Тэгвэл долдугаар сарын башёд бүрэн эдгэрсэн их аварга тун өнгөтэй явна.

Башёгийн ес дэх өдөр Тэрүнофүжи комүсүби Дайэйшог давж, 9-0 гэсэн амжилтыг үзүүлэв. Түүний араас озэки Котозакүра болон Чүраномоүми хоёр долоон даваа, хоёр унаатай удаалж байна. Бусад монгол бөхчүүдийн тухайд озэки Хошорюү С.Бямбасүрэн зургаан даваа, гурван унаатай, сэкивакэ Киришима Б.Лхагвасүрэн, Тамаваши Б.Мөнх-Оргил хоёр таван даваа, дөрвөн унаатай тус тус башёг үргэлжлүүлж буй.

Харин өнгөрсөн тавдугаар сард Япон улсын иргэн болсон Чиёошома Г.Мөнхсайхан бэртлийн улмаас башёг үргэлжлүүлэх боломжгүй болжээ.

Өнөөдөр ёкозүна Тэрүнофүжи Г.Ган-Эрдэнэ сэкивакэ Киришима Б.Лхагвасүрэнтэй хүч үзнэ. Ёкозүнагийн зөвлөлөөс Тэрүнофүжи Г.Ган-Эрдэнийг тун анхааралтай ажиглаж байгаа. Бэртлийн улмаас хоёр ч башё дараалан бүтэн барилдаж чадаагүй түүнийг долоо болон есдүгээр сарын башёд ямар амжилттай барилдахыг харгалзан зодог тайлуулах эсэхийг нь шийднэ гэх мэдээ гарчээ.